«Қайраттың» бұрынғы футболшысы ойнаған клуб 14 ұпайлық басымдығын шашып, чемпиондықтан айырылды
Қазақстандық «Қайраттың» бұрынғы қорғаушысы Егор Сорокин өнер көрсететін Қытайдың «Чэнду Жунчэн» клубы мәреге бес тур қалғанда 14 ұпайлық басымдығы бола тұра, чемпиондық атақтан сенсациялық түрде айырылып қалды, деп хабарлайды Sports24.kz.
Қыркүйектің басында команда Қытай Суперлигасының турнирлік кестесінде сенімді түрде көш бастап, ең жақын қуғыншысы «Далянь Инбодан» 14 ұпайға озып, 51 ұпай жинаған еді. Алайда маусымның шешуші кезеңі нағыз сәтсіздікке ұласты.
Соңғы бес турда «Чэнду» мүмкін болған 15 ұпайдың тек біреуін ғана еншіледі. Команда «Хэнаньмен» 0:0 есебімен тең түсіп, одан кейін «Тяньцзиньге» (0:1), «Шанхай Портқа» (0:3) және «Даляньға» (0:1) қатарынан жол берді.
Соңғы тур қарсаңында Джон Алоизидің шәкірттеріне чемпион атану үшін тең ойын жеткілікті еді. Алайда «Чэнду» «Шаньдун Тайшаньға» 2:3 есебімен жеңіліп қалды, ал «Далянь» «Тяньцзиньді» 3:1 есебімен ұтты.
Нәтижесінде екі клуб та 52 ұпайдан жинады, алайда өзара кездесулердегі басымдығының арқасында «Далянь» тарихында алғаш рет алтын медальға қол жеткізді.
Айта кетейік, Сорокин 2026 жылдың ақпанында «Қайраттан» Қытайға ауысты. Аяқталған маусымда ресейлік қорғаушы төрт гол соқты. Бұған дейін футболшы алматылық клубтың Чемпиондар лигасының негізгі кезеңіне шығуына көмектескен еді.
