93-минуттағы гол: Араухо жеңіс сыйлап, «Барселонаны» Ла Лиганың көшіне шығарды
18 қазан күні «Олимпий» стадионында өткен Ла Лиганың 9-туры аясындағы матчта «Барселона» мен «Жирона» тартысты ойында кездесті. Кездесу соңғы секундтарда шешімін тауып, Флик шәкірттері жеңіске жетті - 2:1.
Ойынның алғашқы минуттарында алаң иелері шабуылын нәтижелі аяқтап, 13-минутта Педри есеп ашты. Алайда көп ұзамай 20-минутта Аксель Витсель таразы басын теңестірді.
Бір ұпай үшін барын салған «Жирона» қорғаныста тығыз ойнады, бірақ 93-минутта Рональд Араухоның баспен соққан добы каталондықтарға жеңіс сыйлады.
Ла Лига. 9-тур
«Барселона» — «Жирона» — 2:1 (1:1)
Голдар: Педри, 13 (1:0). Витсель, 20 (1:1). Араухо, 90+3 (2:1).
Бұл жеңіс «Барселонаға» 22 ұпай жинап, турнирлік кестеде бірінші орынға шығуға мүмкіндік берді. Ал «Жирона» 6 ұпаймен 19-орында қалып, түсіп қалу аймағынан шыға алмады.
