«Асу Алмабаевтан озып кетуі мүмкін»: қазақстандық жаттықтырушы Рамазан Теміровтың UFC-дегі мүмкіндігін бағалады
24 қазанда Абу-Дабиде (БАӘ) өтетін UFC 333 турнирінде өзбекстандық файтер Рамазан Теміров UFC-дің ең жеңіл салмақ дәрежесі рейтингінде алтыншы орында тұрған Лонир Каванамен кездеседі.
Жекпе-жек қарсаңында Saq Pro Team командасының бас жаттықтырушысы әрі жекпе-жек сарапшысы Дәулет Нұрланұлы Sports24.kz-ке берген эксклюзивті сұхбатында Теміровтың мүмкіндігін бағалап, өзбекстандық спортшының титулдық жарыста қазақстандық Асу Алмабаевтан қалай оза алатынын түсіндірді.
Алдыңғы жекпе-жегінде допингке қарсы ережені бұзғаны үшін дисквалификацияланғаннан кейін Теміров Стив Эрцегпен кездесіп, австралиялық файтерді бірінші раундта нокаутқа түсірді. Бұл жеңіс өзбекстандық спортшыға UFC рейтингіне енуге мүмкіндік берді.
Ал Кавана 2026 жылдың басында UFC-дің бұрынғы чемпионы Брэндон Мореноны жеңген. Алайда келесі жекпе-жегінде Брэндон Ройвалға тұншықтыру әдісімен есе жіберді.
«UFC Теміровқа мүмкіндік беріп отыр»
Нұрланұлының пікірінше, ұйым өзбекстандық файтерге рейтингте жоғары көтерілу үшін жақсы мүмкіндік беріп отыр. Сонымен қатар маман әзірге алдағы қарсыластыққа егжей-тегжейлі талдау жасамағанын атап өтті.
«Теміров пен Кавананың жекпе-жегін мұқият зерттеген жоқпын, бірақ UFC-дің Теміровқа қалай мүмкіндік беріп отырғаны бірден көрініп тұр. Өткен жолы өзбекстандық файтер дисквалификациядан кейін рейтингтің топ-10 санатындағы қарсыласпен жекпе-жек өткізіп, Стив Эрцегті нокаутқа түсірді. Ал бұл жолы оған рейтингте одан да жоғары тұрған файтерді берді», - деді Нұрланұлы.
Сарапшы Теміровқа қарсыластарды таңдауға Өзбекстан аудиториясына деген қызығушылықпен қатар, файтердің өзі көрсететін тартымды жекпе-жек стилі де әсер етуі мүмкін екенін айтты.
«Бәлкім, UFC-ді Өзбекстан аудиториясы қызықтыратын шығар. Немесе оның тартымды, нокаутқа бағытталған стилі осындай топ-дәрежедегі қарсыластарға жол ашып отырған болуы мүмкін. Ол тік тұрыста жұдырықтасып, қарсыластарын нокаутқа түсіреді», - деді жаттықтырушы.
«Теміров Асу Алмабаевтан озып кетуі мүмкін»
Нұрланұлы Каванаға қарсы жеңіс өзбекстандық файтердің ең жеңіл салмақтағы титулдық жарыстағы позициясын айтарлықтай нығайта алады деп есептейді. Мұндай жағдайда Теміров чемпиондық жекпе-жекке жақындауға талпынып жүрген Асу Алмабаевқа тікелей бәсекелес атануы мүмкін.
«Егер ол бұл қарсыласын да нокаутқа түсірсе немесе тартымды түрде жеңсе, титулдық жарыста біздің Асу Алмабаевтан озып кетуі мүмкін», - деп түйіндеді Нұрланұлы.
