Бокс әлеміндегі сұмдық: аңызға айналған әлем чемпионы кенеттен қайтыс болды
Әлемдік кәсіпқой бокс қауымы ХХ ғасырдың ең даңқты чемпиондарының бірі кенеттен қайтыс болуына байланысты қара жамылды, деп хабарлайды Sports24.kz.
Орта салмақта WBA нұсқасы бойынша бұрынғы әлем чемпионы, аргентиналық Хорхе Кастро 59 жасында қайтыс болды. Ол «Ронья» деген лақап атымен аса танымал еді. Қайғылы жаңалықты El Argentino басылымы полиция есептеріне сілтеме жасап хабарлады.
- Сондай-ақ оқыңыз: АҚШ-та Жәнібек Әлімханұлының қарсыласының мүмкіндігі бағаланды
Бұрынғы боксшы Буэнос-Айрес провинциясындағы Морон қаласында бинго ойнайтын залда кенеттен өзін жайсыз сезінген. Дәрігерлер аңыз спортшыны аман алып қала алмады. Қайғылы оқиғаның нақты мән-жайы мен өлімнің медициналық себебін қазір мамандар анықтап жатыр.
Кастро қайсар мінезі мен жойқын нокауттық соққысының арқасында Оңтүстік Америка спортындағы культтік тұлға саналды. Жанкүйерлер оны осы қасиеті үшін «Локомотив» деп те атаған.
Оның 1994 жылы америкалық Джон Дэвид Джексонға қарсы өткізген әйгілі чемпиондық жекпе-жегі әлемдік бокс тарихындағы ең драмалық нокауттардың бірі ретінде спорт жылнамасына енді.
Айта кетейік, Хорхе Кастро кәсіпқой рингте 144 жекпе-жек өткізіп, 130 жеңіске жеткен, оның 90-ында қарсыласын нокаутқа түсірген. Орта салмақта WBA нұсқасы бойынша чемпион болған кезінде аргентиналық өз титулын төрт рет сәтті қорғады.
