АҚШ Жәнібек Әлімханұлының қарсыласының мүмкіндігін бағалады
Boxingnews24.com сайты қазақстандық Жәнібек Әлімханұлы мен даниялық Якоб Банк арасында екінші орта салмақтағы WBO нұсқасы бойынша бос әлем чемпионы титулы үшін өтуі ықтимал жекпе-жекке болжам жасады, деп хабарлайды Sports24.kz.
Жәнібек Әлімханұлы мен Якоб Банк арасындағы жекпе-жек қаңтар айында өтуі мүмкін. Кездесу Данияда ұйымдастырылуы тиіс. Өтетін нақты күн мен орын кейінірек жарияланады. Жекпе-жекте екінші орта салмақтағы WBO нұсқасы бойынша бос әлем чемпионы атағы сарапқа салынады.
Boxingnews24.com материалында Жәнібектің чемпиондық жекпе-жектерде тәжірибесі мол екені атап өтіледі. Сонымен қатар авторлар қазақстандық боксшының екінші орта салмақта әлі де өзін толық танытуы қажет екенін көрсеткен.
«Жәнібектің чемпиондық жекпе-жектердегі тәжірибесі басым, алайда ол екінші орта салмақта әлі де өзін танытуы керек. Банк оның ірілеу қарсыластармен жекпе-жекте мүмкіндігін сынап, әлем чемпионы атағы үшін алғашқы айқасын мансабындағы ең ірі жеңіске айналдыра алады», — делінген материалда.
Boxingnews24.com пікірінше, Банк үшін Жәнібектің соққыларына төтеп беріп, қысымды жалғастыра алу қабілеті маңызды фактор болады. Егер даниялық боксшы күштік айқасты таңып, қазақстандықты тұрақты қысым жағдайында жұмыс істеуге мәжбүрлей алса, Жәнібек үшін жекпе-жек оңайға соқпауы мүмкін.
«Егер Банк Жәнібектің қуатты соққыларына төтеп беріп, қысымын жалғастыра алса, орта салмақтағы бұрынғы чемпионды қиын кеш күтуі мүмкін», - деп жазады басылым.
Болжам авторлары Әлімханұлының жекпе-жек қашықтығын бақылауы қажет болады деп есептейді. Қазақстандық боксшы үшін негізгі элементтер ретінде джеб, шабуылға шығатын сәтті таңдау және қарсыласына айқасты күштік текетіреске айналдыруға мүмкіндік бермеу шеберлігі аталды.
«Жәнібек алмасуларды бақылап, Банкке күштік текетіресті таңуға мүмкіндік бермеу үшін джебін және соққы жасау сәтін таңдай білу қабілетін пайдалануы керек», - делінген жарияланымда.
Якоб Банк үшін Жәнібекке қарсы жекпе-жек мансабындағы ең маңызды айқасқа айналуы мүмкін. Даниялық боксшы жеңіске жеткен жағдайда, WBO-ның бос титулын иеленіп қана қоймай, өзін екінші орта салмақтағы елеулі боксшылардың бірі ретінде таныта алады.
«Банк Жәнібекті жаңа дивизионда рингтің әр сантиметрі үшін күресуге мәжбүрлеуге мүмкіндік алады. Орта салмақтағы шыңдалған бұрынғы әлем чемпионын жеңу Банктің деңгейін бірден дәлелдейді», - делінген материалда.
Еске сала кетейік, екінші орта салмақтағы WBO титулы британдық Хамза Шираз Жәнібек Әлімханұлымен жекпе-жекте белбеуін қорғаудан бас тартқаннан кейін бос қалған еді. Енді қазақстандық боксшы жаңа салмақ дәрежесінде әлем чемпионы атану мүмкіндігіне ие болуы ықтимал.
