US Open-2026: Рыбакина – Соболенко финалы қашан өтеді
Елена Рыбакина мен Арина Соболенко US Open-2026 чемпионын анықтайды. Әйелдер арасындағы жекелей сынның финалы 12-сінен 13 қыркүйекке қараған түні өтеді. Кездесу Қазақстан уақытымен 01:00-де басталады, деп хабарлайды Sports24.kz.
Рыбакина үшін бұл мансабындағы алғашқы US Open финалы болмақ. Ал Соболенко Нью-Йорктегі шешуші матчқа төртінші жыл қатарынан шығып отыр және турнирді үшінші рет қатарынан жеңуге талпынады.
Елена финал жолдамасын америкалық Коко Гауффқа қарсы кездесуде иеленді. Матчтың басы алаң иесінің пайдасына өтті - Гауфф алғашқы сетті 6:3 есебімен алды.
Алайда сәтсіз басталған бірінші партиядан кейін қазақстандық теннисші ойын барысын өзгерте алды. Рыбакина екінші сетте 6:4 есебімен басым түсіп, шешуші партияны да дәл сондай есеппен өз пайдасына аяқтады.
Бұл жеңіс Еленаны алғаш рет US Open финалына шығарды. Сонымен қатар турнир қорытындысы бойынша Рыбакина әлемнің жаңа бірінші ракеткасы атанады.
Арина Соболенко финалға ертерек жолдама алды. Оның қарсыласы тағы бір америкалық теннисші Джессика Пегула болды.
Алғашқы партияның соңына дейін тартыс сақталды, бірақ Соболенко сетте 7:5 есебімен жеңді. Екінші партияда Арина ойынды толық бақылауына алып, 6:2 есебімен басым түсті.
Енді Соболенко US Open турнирін үшінші рет қатарынан жеңуге бір қадам қалды. Бұған дейін мұндай нәтижеге соңғы рет Серена Уильямс 2012–2014 жылдары қол жеткізген.
Рыбакина мен Соболенконың тағы бір финалы
Елена мен Арина үшін бұл «Үлкен дулыға» турнирлеріндегі үшінші өзара финал болмақ.
Australian Open-2023 финалында Соболенко жеңіске жетсе, 2026 жылдың қаңтарында Рыбакина Мельбурнда реванш алды - 6:4, 4:6, 6:4.
Сондықтан Нью-Йорктегі кездесу алдында олардың мэйджор финалдарындағы есебі тең - 1:1.
Рыбакина үшін бұл матчтың мәні ерекше: ол US Open-дегі алғашқы титулын және Уимблдон-2022 мен Australian Open-2026-дан кейінгі мансабындағы үшінші «Үлкен дулыға» жүлдесін жеңіп алуы мүмкін. Ал Соболенко үшін бұл Нью-Йорктегі тарихи хет-трикке мүмкіндік.
