Рыбакина US Open ширек финалында жаттықтырушысымен сөзге келді
Британдық Tennis365 басылымы Қазақстанның теннисшісі Елена Рыбакинаның US Open-2026 турнирінің Қытай өкілі Чжэн Циньвэньге қарсы ширек финалдық матч кезінде жаттықтырушысы Стефано Вуковпен эмоциялық әңгімесіне назар аударды.
Рыбакина бірінші сетте 3:6 есебімен жеңілгеннен кейін жаттықтырушысымен көтеріңкі дауыспен сөйлесті. Sky Sports комментаторы Наоми Кавадейдің айтуынша, қазақстандық теннисші өзіне ұсынылған тактикаға көңілі толмаған.
«Мұндай жағдай матчтың басынан бері байқалды деуге болады. Рыбакина өзіне не істеу керектігі туралы берілген нұсқауға анық көңілі толмады және іс жүзінде: „Бұл жұмыс істемейді“, — деп айтты. Бірінші сет кезінде-ақ оның қарсыласының өзін алаңда әрі-бері жүгіртіп жүргеніне алаңдағанын естідік. Оның жаттықтырушысы Стефано Вуков: „Сен оған алаңның бұрыштарын ашуға мүмкіндік беріп жатырсың“, — деді. Ал Рыбакина Чжэннің оны тым оңай бір жаққа шығарып жіберетінін айтты», — деді Кавадей.
Бұрынғы британдық теннисші Тим Хенмэн Вуковтың Рыбакинаға берген кеңестерінің мәнін түсіндірді.
«Меніңше, Вуков оған қарсыласының ойынына дәл сондай жауап қайтаруға кеңес берді. Егер Чжэн артқы сызықтан алысырақ орналасса, қысқа бұрыштарды пайдалануға болады. Бұл қарсыласын алаңда көбірек қозғалыс жасауға мәжбүр етеді. Сонымен қатар ол екінші допты қабылдауға да назар аударды: „Дайын болу керек және Чжэн жылдамырақ доп беруге шешім қабылдаса, аяқпен белсенді жұмыс істеу қажет“. Рыбакинаның ойланатын тұстары аз болған жоқ», — деді Хенмэн.
Кавадей мұндай эмоциялық әңгімелердің Рыбакина үшін маңызды матчтарда бұрын да болғанын және кей жағдайда оның ойынды өзгертуіне көмектескенін атап өтті.
«Australian Open турнирін еске түсірсек, Вуков жартылай финал мен финалда Рыбакинаға көп ақпарат беріп, осы кездесулердің барысын өзгертуге шынымен көмектесті. Соболенкоға қарсы финалда Рыбакина есеп бойынша қалып қойды, бірақ ойынға қайта орала алды. Сол кезде Рыбакина жаттықтырушысының кеңесіне құлақ асты. Бұл жолы да олардың арасында шағын пікірталас болды, бірақ Рыбакинаның Вуковтың түсіндіруге тырысқанын қабылдамағаны байқалды», — деп қосты комментатор.
Хенмэн бұл эпизодты жай ғана тактикалық талқылаудан гөрі пікірталасқа көбірек ұқсатты. Ол Рыбакинаның көңіл күйіне және бірінші сетте пайдаланылмай қалған мүмкіндіктеріне назар аударды.
«Бұл талқылаудан гөрі дауға көбірек ұқсады. Оның қатты ренжігені анық еді. Оның бес брейк-пойнты болғанын және олардың ешқайсысын пайдалана алмағанын ұмытпау керек».
Жаттықтырушысымен болған әңгімеден кейін Рыбакина екінші сетте 3:0 есебімен алға шықты. Кейін қазақстандық теннисші матчта камбэк жасап, Чжэн Циньвэньді 3:6, 6:1, 6:4 есебімен жеңді.
Осы жеңістің арқасында Рыбакина алғаш рет US Open турнирінің жартылай финалына шықты. Сонымен қатар ол WTA рейтингінің жаңа бірінші ракеткасы атанатынына кепілдік берді.
