Рыбакина US Open көшбасшыларының қатарында, бірақ басты кортта ойнамай жүр: себебі неде?
Әлеуметтік желіде Елена Рыбакинаның US Open турниріндегі матч кестесі қызу талқыланып жатыр. Жанкүйерлер әйелдер турының басты жұлдыздарының бірі кездесулерін орталық кортта өткізбей жүргеніне назар аударды, деп хабарлайды Sports24.kz.
Қазақстандық әуесқой теннисші Ерик Ильясов мұның ықтимал себебін түсіндірді. Оның айтуынша, ұйымдастырушылар матчтарды корттарға бөлгенде спортшының рейтингтегі орнына ғана сүйенбейді.
Ильясов басты факторлардың бірі ретінде үй турнирінде сәтті өнер көрсетіп жатқан америкалық теннисшілердің көптігін атады.
«Бір сәт ойланып көріңіздер: US Open-ның үшінші айналымына 15 америкалық шықты. Бұл соңғы жылдардағы ең үздік көрсеткіштердің бірі. Қазір АҚШ-та стадион жинайтын өз жұлдыздары мен топ ойыншылары өте көп. Америкалық жанкүйерлер де британдықтар секілді өз спортшыларын ерекше қолдайды», - деді Ильясов.
Оның пікірінше, жоғары рейтинг немесе жоғары себетке ену басты аренада ойнауға автоматты түрде кепілдік бермейді. Ұйымдастырушылар теннисшінің танымалдығын, нақты матчқа деген көрермен қызығушылығын, телевизиялық тартымдылығын және билетке деген сұранысты да ескереді.
Сондықтан Рыбакинаның мәртебесі де кесте жасалған кезде әрдайым шешуші фактор бола бермейді. Турнирде танымал америкалық ойыншылар көп болған жағдайда орталық корттардағы басымдық көбіне соларға берілуі мүмкін.
Биылғы US Open турнирінде Рыбакина әзірге сенімді өнер көрсетіп келеді. Бірінші айналымда қазақстандық теннисші 17 жастағы Теа Фродинді 6:3, 6:2 есебімен жеңді. Екінші кезеңде испаниялық Джессика Боусас Манейродан 6:2, 6:4 есебімен басым түсті. Осылайша, Елена алғашқы екі матчында бірде-бір сет бермей, үшінші айналымға жолдама алды.
