Рыбакина US Open-дегі жеңістен кейін Қазақстанға оралатынын мәлімдеді
Елена Рыбакина US Open-2026 турниріндегі жеңісінен кейін қазақстандық жанкүйерлерге үндеу жасады. Нью-Йорктегі баспасөз мәслихатында теннисші отандастарына қолдау көрсеткені үшін алғыс айтып, Қазақстанға келуді жоспарлап отырғанын жеткізді, деп хабарлайды Sports24.kz.
Финалдан кейін Рыбакинадан турнир бойы оны қолдаған қазақстандықтарға не айтқысы келетіні сұралды.
«Ең алдымен мені қолдап, сенім білдіргендердің барлығына үлкен алғыс айтқым келеді. Жеңістен кейін Қазақстанға әлі барып үлгермедім, бірақ міндетті түрде барғым келеді. Осындай сәтті менің матчтарымды көріп, әр ойыныма алаңдап отырған адамдармен бөлісу мен үшін маңызды. Қазір тенниске қызығатын балалардың көбейіп, секцияларға барып жүргені ерекше қуантады. Бұл жеңіс оларға қосымша мотивация береді деп сенемін. Осы табысты бүкіл елмен бірге атап өткім келеді», - деді Рыбакина.
Нью-Йорктегі жеңіс Рыбакина үшін бірден бірнеше тұрғыдан тарихи болды. Ол алғаш рет US Open чемпионы атанып, «Үлкен дулыға» турнирлеріндегі үшінші титулын жеңіп алды және WTA рейтингінде алғаш рет бірінші орынға көтерілуге мүмкіндік алды. Рейтинг жаңарғаннан кейін Елена жекелей сында әлемнің бірінші ракеткасы атанған Қазақстанның алғашқы өкілі болады.
Финалда Рыбакина Арина Соболенконы 6:4, 5:7, 6:2 есебімен жеңді. Бұл нәтиже беларусь теннисшісінің US Open-дегі 20 матчқа созылған жеңісті сериясын тоқтатты әрі оған Нью-Йоркте қатарынан үшінші рет титул алуға мүмкіндік бермеді.
Бұған дейін Рыбакина Уимблдон-2022 және Australian Open-2026 турнирлерінде жеңіске жеткен. Сонымен қатар ол XXI ғасырда бір маусымда хард төсенішінде өтетін екі «Үлкен дулыға» турнирін де ұтқан үшінші теннисші атанды.
