Рыбакина US Open-дегі жеңісінен кейін жарақаты туралы айтты
Елена Рыбакина US Open-2026 турниріндегі жеңісінен кейін алғашқы әсерімен бөлісті. Қазақстандық теннисші Нью-Йоркке кішігірім жарақатпен келгенін және жарыстың чемпиондық титулмен аяқталатынын күтпегенін айтты, деп хабарлайды Sports24.kz.
Финалда Рыбакина Арина Соболенконы үш сетте - 6:4, 5:7, 6:2 есебімен жеңді. Матчтан кейін Елена бұл нәтиженің өзі үшін қаншалықты күтпеген болғанын жеткізді.
«Қазір тіпті сөз табу қиын. Нью-Йоркке келгенде кішігірім жарақатым болды, сондықтан бәрі дәл осылай аяқталады деп мүлде ойламадым. Бірақ турнир барысында жағдай біртіндеп менің пайдамда өрбіді», - деді Рыбакина.
Қазақстандық теннисші Соболенко туралы да пікір білдірді. Еленаның сөзінше, Аринаға қарсы финалда әр ұпай үшін бар күшін салуға тура келген.
«Арина - үлкен чемпион. Оған қарсы ойнау әрдайым өте қиын. Бүгін барымды салып, әр доп үшін соңына дейін күрестім. Оны және командасын атқарған үлкен жұмыстары үшін құттықтағым келеді», - деді ол.
Рыбакина Нью-Йорктегі жанкүйерлерге де ерекше алғыс айтты. Бұған дейін US Open оның мансабындағы ең сәтті турнирлердің қатарында болмағанымен, биылғы жеңіс бәрін өзгертті.
«Осыған дейін мұнда өткізген жылдарымда дәл осындай нәтижеге жақындап та көрмеппін. Атмосфера керемет болды. Енді Нью-Йорк мен үшін ерекше орынға айналып барады. Бұл сәттер жадымда ұзақ сақталады», - деді Рыбакина.
Бұл Еленаның мансабындағы алғашқы US Open титулы және үшінші «Үлкен дулыға» жүлдесі. Бұған дейін ол Уимблдон-2022 және Australian Open-2026 турнирлерінде жеңіске жеткен.
