Кафельников Рыбакина мен Соболенконы аңызға айналған теннис жұптарымен салыстырды
Әлемнің бұрынғы бірінші ракеткасы және «Үлкен дулыға» турнирлерінің екі дүркін жеңімпазы Евгений Кафельников теннисшілер Елена Рыбакина мен Арина Соболенконың мінез-құлқындағы айырмашылық туралы пікір білдірді, деп хабарлайды Sports24.kz.
Ресейлік маман Рыбакинаның сабырлы мінез-құлқы Соболенконың эмоцияшылдығымен тиімді қарама-қайшы екенін атап өтті. Оның айтуынша, мұндай қарама-қайшылық тенниске пайдасын тигізеді.
Кафельников қазақстандық теннисшінің тек өз ойынына ғана көңіл бөлетінін және көпшілік алдындағы белсенділікке ұмтылмайтынын атап өтті.
«Рыбакина мүлде басқа, бұл — оның даралығы, оны әдемі ететін де осы. Қазір ол өз жұмысын еш алаңдамай, сыртқы дүниеге алаңдататын белсенділіктерге назар аудармай, өте сабырлы түрде атқарып жүр. Ондай нәрселер оны нақты бағытынан тайдыруы мүмкін еді. Оның бойында, бәлкім, осындай стереотип қалыптасқан шығар, оған осы сән-салтанатты даңғазалардың бәрі қажет емес. Егер ол осылай жалғастыра берсе, «Үлкен дулыға» турнирлерінде әлі талай жеңіске жетеді», — деді Кафельников First&Red YouTube-арнасындағы «Хардкорт» шығарылымында.
Ол сондай-ақ теннис тарихындағы ерлер арасындағы белгілі бәсекелестіктермен параллель жүргізіп, Соболенконың эмоцияшылдығын Андре Агасси мен Борис Беккерге, ал Рыбакинаның сабырлылығын Пит Сампрас пен Стефан Эдбергке ұқсатты.
«Теннис үшін бұл жақсы шығар, өйткені Арина өзінің бар эмоциясымен барлық көрерменге әсер етеді — бұл, бәлкім, керемет нәрсе. Ал Аринаға толық қарама-қайшы, салқынқанды әрі тік мінезді теннисші — Лена Рыбакина», — деп қосты Кафельников.
Еске салайық, өткен аптада Рыбакина US Open турнирінің жеңімпазы атанды. Қазақстандық теннисші үшін бұл «Үлкен дулыға» турнирлеріндегі үшінші титул болды.
