Елена Рыбакина ресми түрде әлемнің бірінші ракеткасы атанғаннан кейін қандай тарихи жетістіктерге қол жеткізеді?
Елена Рыбакина US Open-2026 турнирінің ширек финалында Олимпиада чемпионы Чжэн Циньвэньді 3:6, 6:1, 6:4 есебімен жеңіп, әлемдік рейтингтің бірінші орнына шығатынына кепілдік берді. Қазақстандық теннисші Нью-Йоркте алғаш рет жартылай финалға жолдама алды.
Жаңартылған WTA рейтингі 14 қыркүйекте жарияланады. Сол күні Рыбакина ресми түрде әлемнің бірінші ракеткасы атанады.
Қазақстан тарихындағы тұңғыш №1
Рыбакина Қазақстан теннисі үшін бұрын-соңды болмаған жетістікке қол жеткізеді. Ол әйелдер мен ерлер арасында жекелей сында әлемдік рейтингтің бірінші орнына көтерілген Қазақстанның тұңғыш өкілі атанады.
Бұған дейін қазақстандық теннисшілердің ешқайсысы ATP немесе WTA жекелей рейтингінің шыңына шықпаған.
WTA тарихындағы 30-шы бірінші ракетка
Рыбакина әлемдік теннис тарихына да енеді. Ол WTA рейтингі енгізілгеннен бері оның бірінші орнына көтерілген 30-шы теннисші болмақ.
2026 жылға дейін Еленаның мансабындағы ең жоғары көрсеткіші үшінші орын болатын. Биыл ол алдымен екінші сатыға көтеріліп, енді рейтингтің шыңына жетті.
Соболенконың көшбасшылығын тоқтатады
Рыбакинаның бірінші орынға шығуымен Арина Соболенконың ұзақ уақытқа созылған көшбасшылығы аяқталады. Беларусь теннисшісі рейтингтің бірінші сатысында 2024 жылдың қазанынан бері тұрған.
US Open-дегі ширек финалдық жеңістен кейін Рыбакина Соболенконы басып озатынына математикалық тұрғыда кепілдік берді.
Екі «Үлкен дулыға» және әлемнің бірінші ракеткасы
Рыбакинаның қоржынында қазір 13 WTA титулы бар. Олардың қатарында екі «Үлкен дулыға» жүлдесі - Уимблдон-2022 және Australian Open-2026 бар.
Сонымен қатар Елена 2025 жылғы WTA қорытынды турнирінде топ жарды. 2023 жылы Индиан-Уэллс пен Римдегі WTA 1000 жарыстарында жеңіске жетті.
Осылайша, 14 қыркүйектен кейін Рыбакинаның жетістіктер тізімінде екі «Үлкен дулыға» титулы, WTA қорытынды турнирінің жеңісі және әлемнің бірінші ракеткасы мәртебесі қатар тұрады.
Қазақстанның «Үлкен дулығадағы» тарихын да өзгерткен
Рыбакина Қазақстан атынан бұған дейін де бірнеше тарихи нәтиже көрсеткен.
2022 жылы Уимблдонды жеңіп, жекелей сында «Үлкен дулыға» турнирінің чемпионы атанған Қазақстанның алғашқы өкілі болды. Ал 2026 жылы Australian Open-де топ жарып, мансабындағы екінші мэйджорын жеңіп алды.
Биыл US Open-де де жаңа белес бағындырды. Наоми Осаканы жеңіп, алғаш рет Нью-Йорктегі турнирдің ширек финалына шықты және төрт «Үлкен дулығаның» барлығында кемінде ширек финалға жету жетістігін толықтырды. Кейін Чжэн Циньвэньнен басым түсіп, US Open-дегі алғашқы жартылай финалына жолдама алды.
Он жылға созылған жол
Рыбакинаның қазіргі жетістігі оның рейтингтегі ұзақ жолын одан әрі айшықтай түседі. 2019 жылы Бухарестте алғашқы WTA титулын жеңіп алғаннан кейін Елена алғаш рет әлемнің үздік жүздігіне кірді. Кейін топ-20, топ-10, үшінші және екінші орындарға дейін көтерілді.
Осылайша, 14 қыркүйекте Елена Рыбакина ресми түрде әлемнің бірінші ракеткасы атанып, Қазақстан теннисінің тарихында жаңа парақ ашады. Ол WTA тарихындағы 30-шы №1 және әлемдік жекелей рейтингтің шыңына шыққан Қазақстанның тұңғыш өкілі болады.
