Видео: Алматыда 45 мың көрерменге арналған болашақ стадионның жаңа келбеті көрсетілді
Алматыда салынуы жоспарланған жаңа футбол стадионының жаңартылған визуализациясы таныстырылды. Алматы даму орталығы болашақ аренаның қандай болатынын көрсететін бейнеролик жариялады, деп хабарлайды Sports24.kz.
Жаңа стадион енді 45 мың көрерменге есептелген. Жоспар бойынша нысан УЕФА-ның төртінші санат талаптарына сәйкес салынып, халықаралық деңгейдегі футбол матчтарын қабылдай алады.
«Бүгін бұл жерде құрылыс алаңы болса, ертең 45 мың жанкүйерге арналған заманауи футбол стадионы бой көтереді. Арена УЕФА-ның төртінші санат талаптарына сай салынып, халықаралық кездесулер өткізуге бейімделеді», - делінген бейнеролик сипаттамасында.
Алматыда халықаралық деңгейдегі жаңа стадион салу жоспары туралы алғаш рет 2025 жылдың тамызында белгілі болған. Кейін, желтоқсан айында, аренаның 35 мың орынға есептелетіні айтылып, болашақ нысанның алғашқы макеттерінің бірі көрсетілді.
Алайда кейін жобаға өзгеріс енгізілді. Алматы әкімдігі стадион сыйымдылығының бірден 10 мың орынға - 35 мыңнан 45 мыңға дейін арттырылатынын хабарлады. Сонымен бірге аренаның сыртқы келбеті де жаңартылды.
Жаңа визуализацияға қарағанда, стадион заманауи сопақ пішінде салынып, жабық трибуналармен жабдықталмақ. Жоба тек ішкі жарыстарға емес, халықаралық матчтарды өткізуге де бағытталған.
Осылайша, болашақ стадион Қазақстандағы ең ірі футбол ареналарының біріне және Алматының жаңа маңызды спорт нысандарының біріне айналуы мүмкін.
