«Соңына дейін күрестім». Әбужақынова әлем чемпионатының финалының негізгі эпизоды туралы пікір білдірді
Будапештте өткен дзюдодан әлем чемпионатында күміс жүлде иеленген Қазақстан құрамасының мүшесі, 48 келіге дейінгі салмақтағы балуан Әбиба Әбужақынова финалдағы шешуші сәт туралы пікір білдірді.
«Ең қиын қарсыласым – дәл осы финалдағы италиялық балуан болды деп ойлаймын. Шыны керек, ол қандай әдіс қолданатынын алдын ала біліп, соған арнайы дайындалдым. Бірақ белдесудің ең маңызды сәтінде сол әдіске түсіп қалып, қарсыласым ұпай еншіледі. Бұл жағдай мен үшін шешуші бұрылысты сәт болды. Уақытымыз өте аз қалған еді. Сол себепті бар күшімді жинап, тәуекелге барып шабуылға кірістім. Соңына дейін күрестім, қолдан келгеннің бәрін жасадым»,– деді Әбиба
Бұл – оның мансабындағы алғашқы әлемдік финал. Осылайша, Әбиба Әбужақынова – Қазақстан әйелдер дзюдосы тарихында әлем чемпионатының шешуші белдесуіне дейін жеткен алғашқы спортшы атанды. Бұған дейін қазақстандық әйел балуандар үшін ең жоғарғы нәтиже – қола медаль ғана болған.
Финалға дейін Әбиба Испаниядан келген Лаура Мартинес Абелендуге қарсы күресте сенімді жеңіске жетті. Қарсыласы үш шидо алып, автоматты түрде жеңілді деп танылды.
Бұл күміс медаль – Әбибаның халықаралық ареналардағы жарқын жетістіктер тізбегінің заңды жалғасы. Ол бұған дейін екі мәрте әлем чемпионатының қола жүлдегері (2022, 2024), бірнеше мәрте Гран-при кезеңдерінің жеңімпазы, жастар арасындағы әлем чемпионатының финалисі болған және Париждегі Олимпиада ойындарына қатысқан.