Олимпиадалық тәжірибе – басқаруда: Қазақстан күрес федерациясында жаңа тағайындаулар жарияланды
19 желтоқсанда Қазақстанның грек-рим, еркін және әйелдер күресі федерациясының жалпы жиналысы өтіп, алдағы жылдарға арналған спорт түрінің негізгі даму басымдықтары айқындалды.
Негізгі назар қазіргі заман талаптары мен мемлекеттік стратегиялық міндеттерге жауап беретін тұрақты және бірыңғай басқару жүйесін құруға аударылды.
Федерацияның баспасөз қызметі хабарлағандай, отырысқа күрес қауымдастығының өкілдері – спорт ардагерлері, аймақтық федерация делегаттары, қазіргі спортшылар мен функционерлер қатысты. Кездесу барысында стратегиялық жоспарлау, кадрлық саясат және күресті барлық деңгейде кешенді дамыту тетіктері талқыланды.
Жиын қорытындысы бойынша Федерацияның басшылық құрамы жаңартылды. Вице-президенттер болып Атланта Олимпиадасының чемпионы Юрий Мельниченко мен Лондон Олимпиадасының жүлдегері Ақжүрек Танатаров тағайындалды. Бас хатшы қызметіне бұған дейін «Қазақ күресі» қауымдастығын табысты басқарған Дамир Бекбосынов келді. Сонымен қатар, басқарудағы сабақтастық сақталды: вице-президенттер статусында Нұржан Қатаев, Дәурен Жабасов және Сабыржан Зайнидинов өз жұмыстарын жалғастырады.
Жиынның жеке блогы ұлттық құрамалардың бапкерлік штабының жасақталуына арналды. Еркін және әйелдер күресінен бас бапкер лауазымына үміткерлер өз даму бағдарламаларын таныстырды. Еркін күрес құрамасының бас бапкеріне Аслан Байғұлов, әйелдер ұлттық құрамасының тізгінін Адилет Ермаковқа сеніп тапсыру ұсынылды.
Талқылау барысында Федерацияның басты күші – біріккен мамандар, спортшылар мен энтузиастар қауымы екені бірнеше мәрте атап өтілді. Қатысушылардың пікірінше, күрестің дамуы жекелеген бастамаларға емес, ортақ стандарттарға, ашық шешімдер мен аймақтар арасындағы нақты үйлесімге негізделуі тиіс.
Федерация президенті Еркін Окасов шешім қабылдау мәдениеті мен барлық деңгейдегі жауапкершіліктің ерекше маңызын атап өтті:
«Алдымызда күресті жүйелі, әділ әрі ұзақ мерзімді дамыту міндеті тұр. Аймақтарда жұмыс бірыңғай қағидаттармен жүргізілуі керек, ал әр шешім кәсіби қауымдастық үшін ашық әрі түсінікті болуы тиіс», – деп атап өтті ол.
Жалпы жиналыс қорытындысында Еркін Окасов барлық ұсыныстар мен бастамалар нақты іс-қимыл жоспарына айналатынын, ал Федерация сала өкілдерімен ашық әрі конструктивті диалогты жалғастыратынын мәлімдеді.
Сондай-ақ Елдос Сметов татамиге қайта оралды.