Ербол Мырзабосынов Қазақстанның туризм және спорт министрі қызметінде қалды
Ербол Мырзабосынов Қазақстанның Туризм және спорт министрі болып қайта тағайындалды, деп хабарлайды Sports24.kz.
«Мырзабосынов Ербол Қуантайұлын Қазақстан Республикасының Туризм және спорт министрі қызметіне тағайындау туралы», – делінген Ақорданың ресми хабарламасында.
Ербол Мырзабосыновтың өмірбаяны
Ербол Мырзабосынов 1984 жылы Шығыс Қазақстан облысында дүниеге келген. Ол бірнеше жоғары оқу орнын тәмамдаған. Семей мемлекеттік педагогикалық институтын, Қазақ гуманитарлық-заң инновациялық университетін және Қазақ спорт және туризм академиясын бітірген.
Мырзабосынов еңбек жолын 2005 жылы Семей мемлекеттік педагогикалық институтында бастады. Ол дене шынықтыру және спорт теориясы мен әдістемесі кафедрасында ассистент әрі оқытушы-жаттықтырушы болып жұмыс істеді.
2009–2014 жылдары Семей мемлекеттік медицина университетінің дене тәрбиесі кафедрасында оқытушы болды. Сонымен қатар дене тәрбиесі кафедрасының меңгерушісі қызметін атқарды.
2006–2018 жылдары Мырзабосынов КММ «Шығыс Қазақстан облыстық спорттың бұқаралық түрлері бойынша жоғары спорт шеберлігі мектебінде» оқытушы-жаттықтырушы болып еңбек етті.
2018–2020 жылдары «Қызылжар Арландары» спорт клубының директоры қызметін атқарды. Ал 2020–2021 жылдары Qazaq kuresi қауымдастығының басқарушы директоры болды.
2021 жылдың наурызынан бастап Мырзабосынов Дене шынықтыру және бұқаралық спорт академиясының ректоры қызметін атқарды.
2023 жылғы 27 ақпанда ол Спорт істері комитетінің төрағасы болып тағайындалды.
2024 жылғы қыркүйекте Ербол Мырзабосынов Қазақстанның Туризм және спорт министрі қызметіне тағайындалды.
