Усман Нурмагомедовтың менеджері спортшының UFC-ге ықтимал ауысуы туралы пікір білдірді
Усман Нурмагомедовтың менеджері Ризван Магомедов ресейлік спортшының UFC-ге ықтимал ауысуы туралы қауесетке түсініктеме берді. Оның айтуынша, әзірге соңғы шешім қабылданған жоқ, ал PFL-дің жеңіл салмақтағы чемпионының командасы ресми ұсыныстар алған жоқ, деп хабарлайды Sports24.kz.
Ризван Магомедов Усман Нурмагомедовтың UFC-ге ауысу мәселесі түпкілікті шешілді деген ақпаратты жоққа шығарды. Менеджердің сөзінше, спортшының PFL-мен эксклюзивті келіссөздер жүргізу мерзімі әлі аяқталған жоқ. Сондықтан әзірге UFC-пен нақты уағдаластықтар туралы айтуға әлі ерте. Магомедов Нурмагомедовтың командасы келесі аптада PFL басшылығымен кездесуі тиіс екенін атап өтті.
Менеджер қазіргі таңда UFC-пен ешқандай ресми келіссөз болмағанын атап өтті. Сондай-ақ оның айтуынша, спортшының командасы PFL тарапынан ұсыныс алып, оны қабылдамады деген ақпарат та шындыққа жанаспайды.
«Мұның бәрі өтірік. Әзірге PFL-мен эксклюзивті келіссөздер жүргізу мерзімі аяқталған жоқ. Бір аптадан кейін PFL басшылығымен кездесеміз. Олар ресми ұсыныс жасайды, содан кейін соған қарай әрекет етеміз», - деді Магомедов Азамат Бостановқа берген сұхбатында.
Сонымен қатар Магомедов UFC-пен келісімшартқа қол қойылған жағдайда, Нурмагомедов титулдық жекпе-жекке тез жақындай алатынын жоққа шығармады. Оның сөзінше, ресейлік спортшыға чемпиондық мүмкіндікке ие болу үшін небәрі бір жекпе-жек жеткілікті болуы мүмкін.
«UFC-пен де, ықтимал қарсыласпен де, PFL тарапынан ұсыныс болып, оны қабылдамау туралы да ешқандай келіссөз болған жоқ. Қандай нұсқалар бар екенін қарап, бәрін таразылап, ойланып, содан кейін шешім қабылдауымыз керек. Меніңше, UFC-пен келісімшартқа қол қойылған жағдайда, ол титулдық жекпе-жекке бір ғана кездесуде жетуі мүмкін», — деді менеджер.
Биыл шілдеде Усман Нурмагомедов PFL-мен қолданыстағы келісімшарты бойынша соңғы жекпе-жегін өткізді. 28 жастағы жеңіліс көрмеген спортшы америкалық Арчи Колганды бірінші раундта-ақ нокаутқа түсірді. Осыдан кейін Нурмагомедов аралас жекпе-жек әлеміндегі ең сұранысқа ие еркін агенттердің біріне айналды. Қазіргі таңда ол PFL-дің жеңіл салмақтағы чемпионы мәртебесін сақтап отыр.
Нурмагомедовтың өзі бұған дейін өз күшіне сенімді екенін және ең үлкен сын-қатерлерге дайын екенін мәлімдеген еді. Дереккөздің ақпаратына сәйкес, ресейлік спортшы UFC-де тез арада мүмкіндік алып, жуырда чемпиондық белбеуге ресми үміткер атанған Арман Царукянмен жекпе-жек өткізгісі келеді. Алайда оның менеджері атап өткендей, түпкілікті шешім PFL-мен келіссөздерден және барлық нұсқаны бағалағаннан кейін ғана қабылданады.
