Шавкат Рахмонов жаңа операция туралы жаңалықтардан кейін мәлімдеме жасады
UFC-дің жартылай орта салмақтағы қазақстандық өкілі Шавкат Рахмонов өз денсаулығы мен октагонға оралу мерзімі туралы айтты.
Спортшы жарақаттардың жалғасуына байланысты тағы бір операция жасатуға мәжбүр болғанын, бұл оның қайтып келуін қайтадан кейінге қалдырғанын хабарлады.
Файтердің айтуынша, кәсіпқой спорттағы жол әрдайым оңай бола бермейді, үлкен мақсаттарға жету үшін кейде денсаулығыңды да құрбан етуге тура келеді.
«Жауынгер жолы сирек оңай болады. Тағдыр адам төзе алмайтын сынақты жібермейді. Әр үлкен мақсаттың өз құны бар, кейде бұл құн - денсаулық.
Қазір шынайы айтарым: денсаулығымдағы мәселелер қайта қайталанғандықтан, тағы да хирургиялық араласу қажет болды. Алда - толық сауығу үшін уақыт керек, сондықтан октагонға оралуым тағы да кешіктіріледі.
Бұл жағдайды қабылдау оңай емес, бірақ мен кез келген қиындық – үлкен жолдың бір бөлігі екеніне шын сенемін. Мен міндетті түрде ораламын – бұрынғыдан да мықты, тәжірибелі, жеңіске деген ынтам күштірек болады.
Менің басты мақсатым өзгерген жоқ. UFC-дің чемпиондық белбеуі әлі де Қазақстанға келуі керек. Қасымда болып, қолдау көрсеткен барша жанкүйерлерге алғысым шексіз. Бұл – оқиғаның ақыры емес, оның маңызды кезеңі ғана», – деп жазды Рахмонов X-тегі парақшасында.
Бұған дейін менеджері Дэнни Рубинштейн Рахмоновтың жаңа жарақатына байланысты шамамен тоғыз-он айға қатардан шығып қалғанын хабарлаған болатын. Сонымен қатар, Алматыдағы Naiza 80 турнирінде спортшы көпшілік алдына балдақпен шығып, бұл жанкүйерлер арасында алаңдаушылық тудырды.
Шавкат Рахмонов соңғы жекпе-жегін 2024 жылдың желтоқсанында өткізген еді. Сол уақыттан бері қазақстандық файтер октагонға шықпай, қалпына келуге назар аударып келеді.
