Магомед Анкалаев Алекс Перейраны жеңіп, UFC жартылай ауыр салмағында чемпион атанды
Бүгін, 9 наурыз күні, АҚШ-тың Лас-Вегас қаласында UFC 313 турнирі өтті. Кештің басты жекпе-жегінде жартылай ауыр салмақтағы чемпиондық белдік үшін қазіргі титул иегері Алекс Перейра мен рейтингтің бірінші нөміріндегі үміткер Магомед Анкалаев кездесті. Бес раундқа созылған шайқаста ресейлік спортшы жеңіске жетті.
Жекпе-жек басында Перейра басымдық танытты. Бірінші раундта бразилиялық файтер қарсыласының алдыңғы аяғына жиі соққы жасап, дәлдігімен ерекшеленді (10-9, Перейра). Алайда екінші раундта Анкалаев қарқынын күшейтіп, тізгінді өз қолына алды – сол қолмен жасаған екі ауыр соққысы Перейраны теңселтіп жіберді, раунд соңында бразилиялықтың қимылы бәсеңдей түсті (10-9, Анкалаев, 19-19).
Үшінші раундта ресейлік файтер жекпе-жек барысын толық бақылауына алды. Ол қашықтықты жақсы сезініп, дәл джебтерімен қарсыласын мазалаумен болды. Раундтың соңына қарай жасаған бір соққысы Перейраны шайқалтып жіберді (10-9, Анкалаев, 29-28). Төртінші раундта Анкалаев басымдықты одан әрі күшейтіп, физикалық тұрғыдан үстемдік етті және қарсыласын торға тақап, қыспаққа алды (10-9, 39-37).
Соңғы бесінші раунд тең жағдайда өтті, бірақ Анкалаев алға ұмтылуын тоқтатпай, Перейраны шегінуге мәжбүрледі. Бразилиялықтың қауіпті хайкигіне қарамастан, Анкалаев сенімді түрде жеңіске жетті (10-9, 49-46).
Осылайша, Магомед Анкалаев UFC-дің жартылай ауыр салмақтағы жаңа чемпионы атанды.
Бұл жеңістен кейін оның рекорды 21 жеңіс, 1 тең нәтиже және 1 жеңіліске жетті. Ал Перейраның көрсеткіші – 12 жеңіс пен 3 жеңіліс.
