Двалишвили UFC-дің бұрынғы жұлдызын тас-талқан етіп, күтпеген жерден Усман Нұрмағомедовті жақтап шықты
Грузиялық аралас жекпе-жек шебері Мераб Двалишвили БАӘ-де өткен RAF Abu Dhabi еркін күрес турнирінде сәтті өнер көрсетті. Ол бразилиялық Марлон Мораесті мерзімінен бұрын жеңіп, кейін ел билігіне ресейлік файтер Усман Нұрмағомедов пен оның серіктерін босатуды сұрап, көпшілік алдында үндеу жасады, деп хабарлайды Sports24.kz.
Двалишвили мен Мораес Crossover форматының ережелері бойынша өткен аралық салмақтағы белдесуде кездесті. Тартыс бірінші раундтың өзінде аяқталды. Грузиялық спортшы қарсыласын жауырынымен кілемге басып, таза жеңіске жетті. Бұл Двалишвилидің Real American Freestyle лигасындағы үшінші жеңісі болды. Осылайша, ол күрес промоушеніндегі жеңісті сериясын жалғастырды. Ал Мораес RAF-тағы дебютінде ұйымдағы алғашқы жеңілісіне ұшырады.
Алайда жұрт назарын грузиялық файтердің өнеріне аударған жалғыз жайт оның белдесудегі нәтижесі емес еді. Мораесті жеңгеннен кейін Двалишвили Біріккен Араб Әмірліктерінің билігіне көпшілік алдында үндеу жасап, бірнеше күн бұрын болған жанжалға қатысушылардың бірі Усман Нұрмағомедов пен өзгелерді босатуды сұрады.
«БАӘ билігіне және сол жақтағыларға үндеу жасағым келеді: өтінемін, жігіттерді босатыңыздар! Біз — файтерміз, мұндай жағдайлар болып тұрады... Оларды босатыңыздаршы», - деді Двалишвили.
Әңгіме 11 қарашада Абу-Дабиде болған оқиға туралы. Хабарланғандай, Двалишвили Усман Нұрмағомедовпен және оның командасының өкілдерімен жанжалдасқан. Сөз таласы төбелеске ұласып, содан кейін БАӘ құқық қорғау органдарымен қиындықтар туындаған. Басылымның мәліметінше, Нұрмағомедов алты айға бас бостандығынан айырылған. Алайда берілген мәліметтерде БАӘ билігінің мұндай шешім қабылдағаны ресми түрде расталмаған. Жанжалға қарамастан, Двалишвили ресейлік спортшы мен ұсталған өзге адамдарды босатуды көпшілік алдында қолдады.
RAF-тағы белдесу грузиялық файтерге кәсіпқой аралас жекпе-жектегі сәтсіз өнерінен кейін қайтадан жеңіске жетуге мүмкіндік берді.
