АҚШ Президентінің Ақ үйінде UFC: Макгрегор сенсациялық келісімшартқа қол қойды
Жеңіл және жартылай жеңіл салмақта UFC-дің бұрынғы екі дүркін чемпионы, 37 жастағы ирландиялық Конор Макгрегор октагонға қайта оралатынын ресми түрде мәлімдеді.
Fox News телеарнасының жүргізушісі Шон Хэннитимен сұхбат барысында Макгрегор өзінің келесі жекпе-жегі... Ақ үйде өтетінін хабарлады!
«Барлығы шешілді — келісімшартқа қол қойылды және жіберілді. Конор Макгрегор қайта оралады. Біз АҚШ-тың 250 жылдығына орай Ақ үйде жекпе-жек ұйымдастырамыз», — деді Конор.
UFC-дің бұл ерекше номерлік турнирі 2026 жылдың маусым айына жоспарланған. Бұл оқиға Америка Құрама Штаттарының тәуелсіздігінің 250 жылдығын тойлаудың бір бөлігі болмақ.
Макгрегор соңғы рет 2021 жылдың шілде айында UFC 264 турнирінде өнер көрсеткен. Ол кезде америкалық Дастин Порьеге қарсы бірінші раундта аяқ жарақатынан кейін техникалық нокаутпен жеңіліп қалған еді. Қазіргі кәсіби рекорды — 22 жеңіс және 6 жеңіліс. «Ноториустың» октагонға қайта оралуы әлемдегі жанкүйерлер арасында үлкен қызығушылық тудыруда.
Сондай-ақ МакГрегор Ақ үйдегі UFC турниріндегі жекпе-жек үшін тоғыз таңбалы гонорар алатынын айтты.