Жаңа маусым - жаңа ережелер: Қазақстан чемпионатындағы алтынға талас қалай өзгерді?
Алдағы 2025/2026 жылғы хоккей маусымында қазақстандық жанкүйерлерді бірқатар жаңалықтар күтіп тұр. Федерация жарыстың жаңартылған форматын таныстырды. Чемпион атағы үшін он команда сынға түседі: «Арлан», «Торпедо», «Ақтөбе», «Ертіс», «Горняк», «Бейбарыс», «Номад», «Құлагер», «Сарыарқа» және «Алматы».
Маусым шымылдығын 7 қыркүйекте Көкшетаудағы жарқын кездесу ашады – мұз айдынына өткен жылғы финалистер «Арлан» мен «Торпедо» шығады. Сол күні «Құлагер» – «Ертіс» матчы өтсе, бір күннен кейін «Сарыарқа» – «Номад» және «Алматы» – «Горняк» кездесулері басталады. «Ақтөбе» мен «Бейбарыс» 12 қыркүйекте сырт алаңдағы ойындарымен маусымды бастайды. Ал бірінші кезең 23 желтоқсанда, Жаңа жыл мерекесі алдында аяқталады.
Алғашқы кезеңде барлық командалар бір-бірімен төрт реттен – екі рет өз алаңында, екі рет сырт алаңда – кездеседі. Одан кейінгі екінші кезеңде кесте турнирлік жағдайға қарай қайта жасалады: алғашқы бестіктегі клубтар өз алаңында көбірек матч өткізеді. Жалпы, әр команда тұрақты чемпионатта 54 ойын өткізеді.
Плей-офф кезеңіне үздік сегіздік жолдама алады. Сериялар төрт жеңіске дейін созылады, ал шешуші, жетінші финалдық матч 17 сәуірге жоспарланған. Турнир тарихында алғаш рет қола жүлде үшін матчтар өтеді – үш жеңіске дейін, 29 наурыз бен 9 сәуір аралығында.
Өткен маусымда «Арлан» 65 ұпай жинап, чемпион атанды, ал «Торпедо» жеті ұпай кем жинап, екінші орынға тұрақтады.