ҚХЛ маусымы басталмай жатып «Барыс» негізгі қорғаушысынан айырылды
Астаналық «Барыс» хоккей клубының және Қазақстан құрамасының қорғаушысы Тамирлан Гайтамиров Магнитогорскіде өткен турнир барысында жарақат алып, қатардан шығып қалды.
Клубтың баспасөз қызметінің хабарлауынша, хоккейші ресми түрде жарақат алған ойыншылар тізіміне енгізілді.
Алдын ала мәліметтерге сәйкес, Гайтамиров ҚХЛ-дың тұрақты чемпионатының басында мұз айдынына шыға алмайды. Маусымның басталуына санаулы күндер қалды.
«Барыс» жаңа маусымды 7 қыркүйекте өз алаңында Челябідің «Трактор» командасына қарсы кездесумен бастайды. Ал 9 қыркүйекте астаналықтар Хабаровскінің «Амур» клубын қабылдайды.
Қорғаушының жарақатының қаншалықты ауыр екені және оның мұз айдынына қашан оралатыны әзірге белгісіз.
Бұл жаңалық аясында «Барыс» маусымға дайындықты жалғастыруда. Кеше команда жағдайлық кездесуде Новосібірдің «Сибирь» командасын 3:1 есебімен жеңді. Бүгін осы қарсыласпен қайта матч өтеді.