АҚШ-та қазақстандық талант жарқырады: Сәркенов «Спокан Чифс» командасына ірі жеңіске көмектесті
Алдын ала маусымдық дайындық аясындағы жолдастық кездесуде Батыс хоккей лигасының (WHL) «Спокан Чифс» клубы «Сиэтл Тандербердс» командасын ойсырата жеңіп, 9:3 есебімен басым түсті, деп хабарлайды Shaiba.kz.
Ойынның басты кейіпкерлерінің бірі қазақстандық шабуылшы Асанәлі Сәркенов болды. Ол екі нәтижелі пасымен көзге түсті.
Алдағы уақытта 18 жастағы хоккейші Rookie Showcase 2025 турниріне қатыспақ. Бұл додада ол «Колорадо Эвеланш» сапында өнер көрсетеді. Жарыс 12–14 қыркүйек аралығында өтеді. Турнирге сонымен қатар «Вегас» пен «Юта» клубтары қатысады.
Өткен маусым Сәркенов үшін Солтүстік Америкадағы дебюттік жыл болды. WHL-дың тұрақты чемпионатында ол 52 матч өткізіп, 27 ұпай (10 шайба, 17 пас) жинады. Ал плей-оффта 21 ойында тағы 14 ұпайға (9+5) қол жеткізді. Дегенмен, «Спокан» шешуші серияда «Медисин-Хат Тайгерске» 1:4 есебімен жол беріп, кубоктан құр қалды.