«Каспий» мен «Ордабасы» 13 гол алмасты, «Семей» «Бәйтеректі» жеңіп, чемпиондық додада қалды
29 наурызда футзалдан Қазақстан чемпионатының 31-ші туры өтіп, оның аясында «Каспий» - «Ордабасы» және «Семей» - «Бәйтерек» матчтары өтті.
Ақтаулық «Каспий» мен шымкенттік «Ордабасы» маусымның ең үздік матчы атағына сай ойын көрсетті. Командалар 13 голдан тұратын триллер көрсетті. Кездесудің бірінші таймында ақтаулықтар жауапсыз төрт гол соғып, соңғы минутта бірінші голды өткізіп алды. Ал екінші таймда шымкенттіктер ойынды толығымен бұрып, есепті 4:6-ға жеткізді. Ысқырыққа бес минут қалғанда «Каспий» таразы басын теңестірді, бірақ ойын аяғы «Ордабасының» пайдасына шешілді – 55 секунд қалғанда Фалькао шешуші гол соғып, жеңісті жұлып алды.
Параллельді кездесуде семейліктер оралдық «Бәйтеректі» сенімді түрде ұтып, ұпай жоғалтпай чемпиондық доданы жалғастырды. Семейліктер алматылық «Қайраттан» бір ұпай ғана артта қалды. Тынымсыз Дедезиньо екі рет гол соғып, сұрмергендер тізіміндегі өз орнын нығайтты.
Футзалдан Қазақстан чемпионаты. 31-ші тур. 29 наурыз
«Каспий» - «Ордабасы» - 6:7
Голдар: Риси (1:0), Эвертон (2:0), Литовских (3:0), Эвертон (4:0 ), Карбаев (4:1), Кайо (4:2), Пиялы (4:3), Умирбаев (4:4), Байзаков (4:5 ), Кайо (4:6), Кенжегали (5:6), Риси (6:6), Фалькао (6:7).
«Семей» - «Бәйтерек» - 4:2
Голдар: автогол (1:0), Дедезиньо (2:0), Штибегов (2:1), Негуеба (2:2), Дедезиньо (3:2), Кандидо (4:2).
Бұған дейін 29 наурызда чемпионаттың тағы екі кездесуі өтті. Алматылық «Қайрат» пен «Жетісу» арасындағы кездесу он голмен аяқталса, Рудныйдың «Аят» клубы өз алаңында «Ақтөбені» жеңді.