Қазақстан футзал құрамасы Еуро-2026 жолындағы күресті плей-офф арқылы жалғастырады: қарсылас кім болады?
Қазақстан футзал құрамасы 2026 жылғы Еуропа чемпионатының іріктеу кезеңіндегі шешуші ойында Армения командасына жол берді. Бұл нәтиже армян құрамасына турнирдің финалдық кезеңіне тікелей жолдама алуға мүмкіндік берді, ал Қазақстан өз тобында екінші орын алып, енді жарысты жалғастыру үшін плей-офф матчтарына қатысады.
Турнир регламентіне сәйкес, топтық кезеңді екінші орынмен аяқтаған үздік сегіз команда қалған жолдамалар үшін бақ сынайды. Қазіргі таңда Қазақстаннан бөлек бұл тізімде Босния және Герцеговина, Беларусь, Румыния, Грузия, Бельгия, Словакия және Нидерланд құрамалары бар.
Айта кету керек, Қазақстан футзалдан ірі халықаралық жарыстарда мол тәжірибеге ие: команда Еуро-2016 турнирінің қола жүлдегері атанып, төрт рет әлем чемпионатына қатысқан. Енді құрама Еуропа футзалының элитасына қайта оралу үшін бар күш-жігерін салады.
Сондай-ақ оқыңыз: Қазақстан құрамасы Арменияға жол беріп, Еуро-2026-ға қосымша матчтар арқылы жолдама алуға талпынады