Ресейде Конференциялар лигасындағы «Аталанта» – «Қайрат» матчының нақты есебін атады

Ресейлік футбол комментаторы әрі сарапшы Никита Пискунов Алматының «Қайратының» Конференциялар лигасының жалпы кезеңі аясында италиялық «Аталантаға» қарсы өтетін матчтағы мүмкіндігін бағалады, деп хабарлайды Sports24.kz.

««Аталанта» ойын тұрғысынан, әсіресе шабуылда, жақсы формада. Команда көп гол соғады. Соңғы матчтарда «Аталанта» футболшылары «Фиорентинаға» қарсы ойында екі рет, «Фрозинонеге» қарсы төрт рет, «Миланға» екі, ал «Пафосқа» үш гол соқты. Алайда нидерландылық «Аяксқа» 0:2 есебімен жол берді. «Аталанта» өзі де қарсыластарына қақпасы маңында көптеген қауіпті сәттер жасауға мүмкіндік береді. «Қайрат» осыны пайдалана алады.

Алматылықтардың пайдасына ойнауы мүмкін тағы бір фактор – Италия командасы құрамындағы жарақат алған футболшылардың көптігі. Қазір лазаретте Томас Кристенсен, Джанлука Гаэтано, Джанлука Скамакка, Сеад Колашинац, Франк Кессиэ бар, бұл тізімді жалғастыра беруге болады. «Аталантаның» шабуылға бейім стилі, қорғаныстағы осалдығы және кадрлық мәселелері Қазақстан командасы үшін мүмкіндікке айналуы мүмкін. Дегенмен «Аталантаның» өз алаңында ойнау артықшылығы бар. Ал «Қайрат» үшін ұзақ ұшу қосымша қиындық туғызады. Алматылықтарға үлкен қашықтықты еңсеруге тура келеді, бірақ команда міндетті түрде өз мүмкіндігін тауып, кем дегенде бір гол соғуға тырысуы керек деп есептеймін. Сонымен қатар қарсыластың көп шабуылына дайын болу маңызды.

Менің болжамым бойынша, «Аталанта» бұл матчта 3:1 есебімен жеңіске жетеді», – деді Никита Пискунов.

Еске салайық, жалпы кезеңдегі алғашқы екі турдан кейін «Қайраттың» еншісінде небәрі бір ұпай бар. Алматылықтар латвиялық «Ригамен» 1:1 есебінде тең ойнағаннан кейін, грек клубы «Панатинаикостан» 1:5 есебімен ірі жеңіліс тапты. «Аталантаның» еншісінде үш ұпай бар. Италия командасы кипрлік «Пафосты» 3:1 есебімен жеңді, алайда нидерландылық «Аяксқа» 0:2 есебімен ұтылды.

Италиялық «Аталанта» мен «Қайрат» арасындағы матч 5 қарашада Қазақстан уақытымен 22:45-те басталады.