Тимур Досмағамбетов «Оқжетпеспен» келісімшартты ұзартуға жақын
Белгілі қазақстандық қорғаушы Тимур Досмағамбетов Көкшетаудың «Оқжетпес» клубында мансабын жалғастыруға ниетті.
Журналист Эльдар Аманбаевтың мәліметінше, тараптар жаңа келісімшарт бойынша келіссөздердің соңғы кезеңінде тұр.
Келісім клубтың жаңа бас бапкері ресми түрде бекітілгеннен кейін ұзартылатыны хабарланды. Клуб басшылығы команданың жаңа тізгіншісінің есімін жақын арада жариялауды жоспарлап отыр. Күтілгендей, «Оқжетпестің» түлегі бір маусымға келісімге қол қояды.
Өткен чемпионатта Досмағамбетов команда құрамындағы негізгі ойыншылардың бірі болды. Қорғаушы барлық турнирлерде 26 матч өткізіп, төрт гол және төрт нәтижелі паспен көзге түсті. Маусым қорытындысы бойынша көкшетаулық клуб турнирлік кестеде сегізінші орын алып, 35 ұпай жинады.
Тәжірибелі ойыншымен келісімшартты ұзарту «Оқжетпес» үшін команданы қайта құру мен алдағы маусымға дайындық барысында маңызды қадам болуы мүмкін.
Сондай-ақ «Оқжетпес» легионері ҚПЛ-дің ең қолайсыз қорғаушысын атады.
