Сәтсіз тізім: Әлем чемпионатына шақыртылғанымен, жарақатына байланысты ойнамайтындар кімдер?
Ұлттық құрамаларының өтінішіне енген барлық футболшылар әлем чемпионатында ойнай алмайды. Жарақаттар төрт жылда бір өтетін басты турнирдің алдында кейбір ойыншыларды оқу-жаттығу жиындарында және жолдастық кездесулерде айналып өтпеді, деп хабарлайды Sports24.kz.
Нидерланды
Нидерланды құрамасы қорғаушы Юрриен Тимбердің әлем чемпионатын өткізіп алатынын ресми мәлімдеді. 24 жастағы футболшы шап жарақатынан толық айығып үлгермеді.
Медициналық штабпен кеңес өткізгеннен кейін Тимбердің Нью-Йоркте өтіп жатқан ұлттық құраманың оқу-жаттығу жиынынан шығып қалатыны белгілі болды. Оның орнына Нидерланды құрамасының бас бапкері Рональд Куман «Сандерленд» клубының қорғаушысы Лютсхарел Гертрейданы шақырды.
Бразилия
Бразилия құрамасының басты жұлдызы Неймардан бөлек, турнирді жарақатына байланысты қорғаушы Уэсли Франса да жіберіп алады. Ол Египетке қарсы өткен жолдастық кездесуде (2:1) жарақат алды.
Медициналық тексеру оның сол аяғындағы аддуктор бұлшықетінің жарақатын анықтады. Бразилия құрамасының өтінішіне қорғаушының орнына болашақ «МЮ» жартылай қорғаушысы Эдерсон енді.
Аргентина
Аргентина құрамасы қорғаушы Леонардо Балердидің бұлшықет жарақатына байланысты тізімнен шығарылғанын хабарлады. Оның орнына басты үміткер – Маркос Сенеси.
Германия
Өкінішті шығын – Ленарт Карл. Германия құрамасының 18 жастағы таланты оқу-жаттығу кезінде бұлшықетін үзіп алды.
Жарақаты өте ауыр болып шықты, осы себепті Ленарт 2026 жылғы әлем чемпионатын жіберіп алады. Оның орнына «РБ Лейпциг» клубының жартылай қорғаушысы Ассан Уэдраого шақырылды.
Шотландия
Шотландия құрамасының жартылай қорғаушысы Билли Гилмор Кюрасаомен өткен жолдастық кездесуде жарақат алды. Оның орнына «Манчестер Юнайтед» клубының жас футболшысы Тайлер Флетчер тізімге қосылды.
Австрия
Австрия құрамасы әлем чемпионаты қарсаңында көшбасшыларының бірі — жартылай қорғаушы Кристоф Баумгартнерден айырылды.
Парагвай
Парагвай құрамасында вингер Хулио Энсисо жолдастық кездесуде Никарагуаға қарсы ойында жарақат алып, турнирден тыс қалды.
Марокко
Марокко құрамасының вингері Абде Эззалзули Норвегияға қарсы кездесуде оң жақ тізесінің медиалды жанама байламын жарақаттап алды.
Канада
Турнирдің қосалқы иесі Канада құрамасының басты орталық қорғаушысы Мойзе Бомбито жарақат алды. Ол қазан айында алған аяқ сүйегі сынығынан ұзақ уақыт қалпына келді. Мойзе 2026 жылғы әлем чемпионатына дейін толықтай айығып, Өзбекстанға қарсы жолдастық матчта алаңға негізгі құрамда шықты, бірақ жарты сағаттан соң ақсаңдап қалды. Ресми ақпарат болмаса да, The Athletic Бомбитоның турнирді өткізіп алатынын жазады.
48 команда қатысатын футболдан әлем чемпионатының алғашқы турнирі 11 маусымда ашылу матчымен басталады: Мехикода Мексика мен ОАР командалары кездеседі. Әлем чемпионаты тарихта 23-рет өтеді. Турнир ойындары 16 қаладағы 16 стадионда ұйымдастырылады: АҚШ-та – 11, Мексикада – 3, Канадада – 2 арена.
