Сұмдық жай-жапсар: Италия құрамасының жұлдызы үйінің тонауға ұшырағанын айтып берді
Италия құрамасының қақпашысы Джанлуиджи Доннарумма өзі және отбасы Парижде басынан өткерген ауыр оқиғаның жан түршігерлік жай-жапсарын айтып берді, деп хабарлайды Sports24.kz.
The Telegraph мәліметінше, Парижде қақпашының үйіне күшпен басып кіру ісіне қатысты екі күнге созылған сот отырысы барысында алаңдатарлық жаңа айғақтар жарияланды.
Италиялық футболшы және сол кезде оның сүйіктісі, ал қазір жұбайы Алессия Элефанте түн ортасында қарулы қылмыскерлердің кенеттен басып кіруінен оянып кеткен. Ол кезде әйел жүкті болған. Қаскөйлер олардың авеню Монтеньдегі сәнді пәтеріне кірген.
Сот құжаттарында тонау кезінде Доннаруммаға қатыгездікпен күш қолданылғаны көрсетілген: оның бетіне кастетпен бірнеше рет соққы жасалып, кейін оны және серіктесін кабельдермен байлап тастаған. Қылмыскерлер футболшыға пышақпен қоқан-лоқы көрсетіп, үйді тонау кезінде қымбат сағаттарды, зергерлік бұйымдар мен қолма-қол ақшаны алып кеткен.
Ақырында шабуыл жасағандар ізін суытқаннан кейін, ерлі-зайыптылар өздерін босатып, жақын маңдағы сәнді қонақүйге барып жасырынған. Осыдан кейін ұзаққа созылған қылмыстық тергеу басталып, ақыры іс сотқа жетті.
Айта кетейік, Transfermarkt мәліметінше, 27 жастағы италиялық қақпашының қазіргі нарықтағы құны 45 миллион еуроны құрайды.
