Роналду мен «Ювентус» арасындағы дауда жаңа бетбұрыс болды
«Ювентус» жалақы бойынша қарызға қатысты Криштиану Роналдумен арадағы дау аясында Италияның Жоғарғы кассациялық сотына жүгінді, деп хабарлайды Sports24.kz.
Клуб португалиялық футболшыға 9,8 миллион еуро төлеуді міндеттейтін шешімге шағым түсірді. Жаңа өтінішті қарау күні әзірге белгіленген жоқ.
Іс коронавирус пандемиясы кезінде жалақы төлемдерін кейінге қалдыру туралы келісімдерге байланысты туындаған. Дереккөздің мәліметінше, Роналду бұрынғы клубынан 19,5 миллион еуро талап еткен.
2024 жылдың сәуірінде арбитраж футболшыға осы соманың шамамен жартысын төлеу туралы шешім шығарды. Сонымен қатар арбитрлер туриндік клуб өкілдері футболшыны әдейі адастырды деген қорытындыға келген жоқ.
«Ювентус» бұл үкімге шағымдануға тырысқанымен, 2026 жылдың қаңтарында сот апелляцияны қабылдамай, алғашқы шешімді күшінде қалдырды. Енді клуб істі Италияның ең жоғары сот инстанциясында қайта қаратуға ұмтылып отыр. Бұл қадам «Ювентустың» 2025/26 маусымына арналған қаржылық есебінде көрсетілген.
Осылайша, төлемдерге қатысты дау әлі аяқталған жоқ.
Роналду командадан 2021 жылы кетіп, «Манчестер Юнайтедке» қайта оралды.
