Ресми есеп бойынша УЕФА тарихындағы ең қымбат футбол клубы белгілі болды
Лондондық "Челси" 2024 қаржы жылының қорытындысы бойынша трансферлерге жұмсалған қаражат тұрғысынан тарихтағы ең қымбат клубқа айналды.
UEFA-ның жыл сайынғы "Еуропалық клубтардың қаржылық және инвестициялық ландшафты" есебіне сәйкес, команданың құрамы клуб иелеріне рекордтық €1,656 млрд-қа түскен. Бұл 2023 жылы "Манчестер Юнайтед" тіркеген алдыңғы көрсеткіштен (€1,422 млрд) асып түсті. Дегенмен, ауқымды қаржылық салымдар әзірге күткен нәтиже бермеді – команда тек трофейсіз қалып қоймай, сонымен қатар Чемпиондар лигасына жолдама ала алмады.
2022 жылдың жазында америкалық бизнесмен Тодд Боэли мен Clearlake Capital консорциумы клубты сатып алғаннан бері "Челси" трансфер нарығында белсенді жұмыс жүргізді. Осы кезеңде клуб алты трансферлік терезеде 41 ойыншымен келісімшарт жасасты.
2019 жылдың шілдесі мен 2024 жылдың маусымы аралығында "Челси" ойыншыларды сатып алуға шамамен €2 млрд жұмсады. Бұл сома басты бәсекелестері – "Манчестер Ситидің" (€1,175 млрд) және "Арсеналдың" (€1,145 млрд) шығындарынан 66%-ға артық. Сонымен қатар, клубтың трансферлік шығындары "Барселона" (€733 млн) мен "Ливерпульден" (€657 млн) әлдеқайда жоғары болды.
Қазіргі таңда "Челси" 46 ұпаймен 5-орында, яғни Еуропа лигасы аймағында тұр. Чемпиондар лигасы аймағына шығу үшін командаға небәрі 1 ұпай жетіспейді – 4-орындағы "Манчестер Ситидің" қоржынында 47 ұпай бар.
Алдын біз "Мен оның қайтып келетініне сенімдімін". Тебас Мессидің Барселонаға оралуы туралы хабарлаған едік.
