«Реал» жұлдызының сабыры таусылды. Ол қаңтарда клубтан кетуге ниетті
Мадридтік «Реалдағы» ахуал қазір өте шиеленісті. Эль-Класико кезінде Винисиус Жуниор ашуға мініп, клубтан кетуді ойласа, енді тағы бір бразилиялық легионер жаңа команда іздеуге бел буды.
ESPN дерегінше, «Реалдың» вингері Родриго бапкерлер штабы тарапынан өзіне лайықты бағасын алмай жүргеніне ұзақ уақыттан бері көңілі толмай жүр. Ол жағдайды өзгертуге мүмкіндік алғанымен, бұл айтарлықтай нәтиже бермеді.
Бразилиялық футболшы «Райо Вальеканоға» қарсы өткен тең матчта қосалқы құрамда қалып, тек ойын соңында алаңға шықты. Бұл жағдай Родригоның шыдамының соңғы тамшысы болды. Ол қатты ренжіп, қысқы трансферлік терезеде жаңа клуб іздеуге бел шешті.
Бұл қадам, үлкен ықтималдықпен, алда келе жатқан әлем чемпионатына байланысты. Бразилиялық шабуылшы турнирге барынша жақсы дайындалғысы келеді, ал қосалқы құрамда отырып, мұндай мақсатқа жету мүмкін емес екенін түсінеді.
