Михаил Мудрик пен допинг ісі: Полиграф ойыншының сөзін растады
Лондондық «Челси» командасының ойыншысы Михаил Мудрик допинг дауының ортасында қалды.
Журналист Виктор Вацконың хабарлауынша, украиналық футболшы бірнеше мәрте полиграф (жалғандық детекторы) тексеруінен өткен, және олардың барлығы бір нәтижені көрсеткен – Мудрик тыйым салынған препаратты әдейі қолданбаған. Оның айтуынша, мельдоний ағзасына абайсызда түскен.
Бұған дейін бұқаралық ақпарат құралдарында Мудрик төрт жылға дейін футболдан шеттетіліп қалуы мүмкін екені айтылған еді. 2024 жылдың соңында тапсырылған екі допинг сынамасы да оң нәтиже көрсетіп, оның ағзасынан тыйым салынған мельдоний анықталған.
Сол уақыттан бері ойыншы ресми матчтар мен жаттығу үдерісінен шеттетілді. Оның соңғы ресми кездесуі қараша айында, Конференциялар лигасында Германияның «Хайденхайм» клубына қарсы матчта өтті, сол ойында Мудрик гол да соққан болатын. Осыдан кейін футболшы команда құрамында көрінбей, өзінің ісіне қатысты шешімді күтіп жүр.
