Криштиану Роналду Португалия құрамасындағы мансабын аяқтайтынын жариялады
Криштиану Роналду Португалия құрамасы сапындағы өнерін аяқтайтынын жариялады. 41 жастағы шабуылшы ұлттық құрамадағы 23 жылдық мансабына қорытынды жасаған қоштасу үндеуін жариялады, деп хабарлайды Sports24.kz.
«Португалия халқы, ұлттық құраманың жетінші нөмірлі жейдесін басқа біреуге табыстайтын күн туды. Ол ешқашан тек маған тиесілі болған емес. Алайда 23 жыл бойы оны киіп, қорғап, әлемнің түкпір-түкпіріндегі стадиондарда еліміздің атынан шығу мен үшін үлкен мәртебе әрі жауапкершілік болды. Енді оны келесі буынға табыстайтын уақыт келді.
Бұл шешімді қабылдау оңай болған жоқ. Кейбір шешімдер тек ақылмен емес, жүрекпен де қабылданады. 2003 жылдың тамызында басталып, өмірімді мәңгілікке өзгерткен жолым мәресіне жетті», - деді Роналду.
Футболшы ұлттық құрама сапындағы жылдар ішінде өзі үшін голдар, рекордтар мен жүлделерден де маңыздысы футбол біріктірген адамдар мен эмоциялар болғанын атап өтті. Сондай-ақ ол командадағы серіктеріне, жаттықтырушыларға, медициналық қызметкерлерге, құрама қызметкерлеріне және отбасына алғыс білдірді.
Португалиялық футболшы матчтар алдында ұлттық әнұран орындалған сәттерді еске алып, жанкүйерлерге арнайы үн қатты.
«Осы бірнеше минут ішінде біздің барлық айырмашылығымыз жоғалады. Клубтар, түстер, таптар, мамандықтар мен пікірлер болмайды. Бар болғаны бір ортақ құштарлық - Португалия. Бұл сезімді өмірімнің соңына дейін өзіммен бірге алып өтемін», - деп атап өтті шабуылшы.
Роналду ұлттық құрамадан басын тік көтеріп кетіп бара жатқанын, өйткені командаға қолынан келгеннің бәрін бергенін айтты. Сонымен қатар ол Португалия үшін алаңдауды және оның жеңістерін жанкүйерлермен бірге тойлауды жалғастыратынына сендірді.
«Мен әлемдегі ең үздік футболшы болу үшін бүкіл өмірімді арнадым. Бүгін менің ең басты жеңісім әлемдегі ең үздік елдің атынан шығу құрметіне ие болғаным екенін түсіндім. Осы 23 жыл үшін рақмет. Маған сеніп, Мадейрада кішкентай бала кезімде футбол добын қуалап жүргенде басталған арманымды жүзеге асыруға мүмкіндік бергендеріңіз үшін рақмет.
Жетінші нөмірлі жейде қала береді. Оны кигеніме деген мақтаныш менімен мәңгі бірге болады. Португалия әрдайым менің бір бөлшегім болып қала береді. Қош болыңыздар, қайта кездескенше», - деп қорытындылады Роналду.
Криштиану Португалия құрамасындағы дебютін 2003 жылдың тамызында жасады. Ол ұлттық құрама сапында 234 матч өткізіп, 146 гол соқты. Осы көрсеткіштердің екеуі бойынша да ерлер арасындағы ұлттық құрамалар тарихындағы әлемдік рекордтың иесі атанды.
Португалия құрамасы сапында шабуылшы 2016 жылғы Еуропа чемпионатында жеңіске жетіп, УЕФА Ұлттар лигасының чемпионы атанды - 2019 және 2025 жылдары.
