Кевин Де Брюйне «Наполиге» ауысуға жақын: Неапольден зәулім вилла сатып алды
«Наполи» футбол клубының президенті Аурелио Де Лаурентис «Манчестер Ситидің» жартылай қорғаушысы Кевин Де Брюйне Италияға көшуге нақты қадам жасағанын растады – бельгиялық футболшы Неаполь қаласынан сәнді вилла сатып алған.
«Кевиннің әдемі вилла сатып алғанын білемін. Бүгін таңертең біз бейнеқоңырау арқылы оның әйелі және ұлымен бірге сөйлестік», – деді Де Лаурентис Tg2 телеарнасының эфирінде.
Ресми келісім әлі жасалмағанымен, «Наполи» басшысы клубтың ойыншыға деген қызығушылығы жоғары екенін атап өтті:
«Ауысты деп нақты айтуға ерте. Бірақ біздің ниетіміз өте байсалды», – деді ол.
Бұған дейінгі ақпараттарға сәйкес, Серия А-ның қазіргі чемпионы Де Брюйнеге жалпы құны 27 миллион еуроны құрайтын үш жылдық келісімшарт ұсынып отыр. Бұл сомаға келісімге қол қою бонусы да кіреді. Барлық рәсімдердің осы аптада аяқталуы мүмкін екені күтілуде.
