Here we go! «Алтын доп» иегері Каннаваро Өзбекстан құрамасымен келісімшартқа келісті
Фабио Каннавароның бапкер ретіндегі жетістіктері әзірге Қытайдағы жұмысымен байланысты. Еуропадағы сәтсіз кезеңнен кейін 2006 жылғы «Алтын доп» иегері қайтадан Азияға оралуды жөн көрді.
Танымал инсайдер Фабрицио Романо Каннавароның Өзбекстан ұлттық құрамасын баптауына қатысты өзінің атақты «Here we go» сөзін айтты. Итальяндық журналистің мәліметінше, оның отандасы 2026 жылғы әлем чемпионатына қатысатын командамен ауызша келісімге келген. Дәл осы Каннаваро Азия құрамасын Солтүстік Америкада өтетін мундиальге бастап шығады.
Тек аздаған егжей-тегжейлер қалды, оларды 4 қазанға дейін шешу жоспарланып отыр.
Каннавароның Еуропадағы соңғы тәжірибесі Загребтің «Динамо» клубында өтті, онда небәрі төрт айдай ғана жұмыс істеді. Ал италиялық «Удинезеден» оны алты матчтан кейін-ақ жұмыстан босатты.
