Хаби Алонсо Вальвердемен туындаған дау туралы қауесеттерге пікір білдірді
Чемпиондар лигасында «Қайратқа» қарсы өткен матчтан кейін (5:0) бас бапкер Хаби Алонсо мен Федерико Вальверде арасындағы жанжал туралы хабарлар тарады. Жартылай қорғаушыны әртүрлі позицияларда қолдану оны қанағаттандырмағаны айтылды.
Алайда бұл қауесеттер негізсіз болып шықты, себебі «бланкос» жаттықтырушысы олардың шындыққа жанаспайтынын айтты. Алонсо баспасөз мәслихатында ешқандай келіспеушілік жоқ екенін, ойыншылар тарапынан ондай наразылық болмағанын мәлімдеді.
«Құрамдағы бірде-бір ойыншы маған белгілі бір позицияда ойнағысы келмейтінін айтқан жоқ. Барлығы командаға қажет жерде өнер көрсетуге дайын», – деді испандық бапкер.
Бұған дейін «Реалдың» көшбасшылары Килиан Мбаппе мен Винисиус Жуниор жанжалдың алдында тұр» деген ақпарат тараған еді.
