ҚФФ ҚПЛ-дің 24-турының ең даулы төрешілік шешімдерін талдады
ҚФФ төрешілік және инспекциялау департаментінің директоры Нуно Алешандре Паррейра де Каштру Премьер-лиганың 24-туры матчтарындағы даулы ойын эпизодтары бойынша түсініктеме берді, деп хабарлайды Sports24.kz.
«Қайрат» — «Елімай»
18-минут. Бірінші эпизодта айып алаңындағы қолмен ойнау ықтималдығы қарастырылды. Шабуыл кезінде №89 ойыншы қарсыластың қақпасына қарай соққы жасайды. Оның алдында №14 қорғаушы тұр, доп оның қолына тиеді.
Қайталаудан қорғаушының қолы денесіне жақын орналасқаны, табиғи қалыпта болғаны және денесінің аумағын ұлғайтпағаны көрінеді. Сондай-ақ доп тигеннен кейін қорғаушының қолын алып кетуге тырысқаны байқалады.
Бұл эпизодта пенальти тағайындауға негіз болған жоқ.
Қорытынды: ойынды жалғастыру туралы шешім дұрыс болды.
«Қайрат» — «Елімай»
32-минут. Екінші эпизодта айып алаңындағы тағы бір жағдай қарастырылды. Допты бергеннен кейін екі ойыншы да допқа қарай қозғалып, күреске дайындалады.
Айып алаңында қорғаушы тоқтайды. Артынан келе жатқан шабуылшы соқтығысты болдырмау үшін қолдарын алдына шығарады. Бұл ретте оның қарсыласын итеруге бағытталған екі қолымен алға қарай жасаған анық қимылы байқалмайды.
Ойыншылар арасында пенальти тағайындауға негіз болмайтын болмашы ғана байланыс орын алды.
Қорытынды: ойынды жалғастыру туралы шешім дұрыс болды.
«Қайсар» — «Оқжетпес»
45+2-минут. Үшінші эпизодта айып алаңындағы жағдай қарастырылды. Допты бергеннен кейін екі ойыншы күреске түсіп, баспен ойнауға тырысады.
Қайталаудан екі футболшының да допқа ойнауға ұмтылып секіргені көрінеді. Бұл ретте қорғаушы артқа қарай қозғалып, шабуылшы ойыншымен байланыстың орын алуына өзі себеп болған. №91 ойыншы допқа басымен ойнайды және оның тарапынан ереже бұзу болмаған.
Қорытынды: голды есептемей қою туралы шешім қате болды.
«Қайсар» — «Оқжетпес»
21-минут. Соңғы эпизодта айып алаңындағы жағдай қарастырылды. Шабуыл кезінде қорғаушы доптың қақпаға кіруіне жол бермеу үшін әдейі қолмен ойнайды. Осыдан кейін бірден шабуылшы соққы жасап, гол соғады.
Қайталаудан қорғаушының қолмен ойнағаны анық көрінеді. Алайда шабуыл жалғасып, команда бірден гол түрінде артықшылыққа ие болды. Сондықтан төреші ойынды тоқтатпай, голды есептегені дұрыс.
Сонымен қатар қорғаушы тарапынан жасалған ереже бұзушылық тәртіптік тұрғыдан бағалануы тиіс.
Қорытынды: гол дұрыс есептелді. Қорғаушыға сары қағаз көрсету керек еді.
