Эпоханың соңы. Серхио Бускетс жыл соңында мансабын аяқтайды
Испания футболының аңызы Серхио Бускетс, қазір МЛС-те «Интер Майами» сапында өнер көрсетіп жүрген, футболдағы мансабын аяқтау туралы шешім қабылдады.
Бұл туралы COPE хабарлайды. Бускетс МЛС маусымы аяқталған соң, қараша немесе желтоқсан айларында, бутсын шегеге іледі. Сол кезде оның «Интер Майами» клубымен келісімшарты да аяқталады.
Биылғы маусымда Серхио МЛС-те 27 матч өткізіп, 7 нәтижелі пас берген.
Бускетс – «Барселона» академиясының түлегі. Каталондық клуб сапында ол 722 матч өткізіп, 18 гол соққан. Культтік футболшы «Камп Ноуда» ұлттық және еуропалық барлық мүмкін болатын трофейлерге қол жеткізді. Сонымен қатар, Испания құрамасымен әлем және Еуропа чемпионы атанды.
Айта кетейік, жуырда ғана «Баварияның» аңызы Жером Боатенг та мансабының аяқталғанын жариялаған болатын.
