Эмеридің чемпионаттағы жетінші қатарынан жеңісі. «Астон Вилла» «Ман Юнайтедтен» басым түсті
Бирмингемде «Астон Вилла» ағылшын Премьер-лигасының 17-турында өз алаңында «Манчестер Юнайтедті» қабылдады.
Командалар үзіліске 1:1 есебімен кетті. Бірінші таймның соңғы минуттарында екі ұжым да бір-бірден гол соқты. Морган Роджерс есеп ашты, ал Матеус Кунья дәл соққымен жауап қайырды.
Үзілісте Рубен Аморим команда капитаны Бруну Фернандешті ойыннан алуға мәжбүр болды. Португалиялық жартылай қорғаушының тізе сіңіріне зақым келгені күдіктелуде.
Бірақ қонақтардың қиындықтары мұнымен бітпеді. 58-минутта Роджерс дубль жасап, алаң иелерін екінші рет алға шығарды.
Бұл Унаи Эмеридің командасы үшін чемпионаттағы қатарынан жетінші жеңіс. Барлық турнирлерде бұл қатарынан 10 жеңіс. 36 ұпай жинаған бирмингемдіктер АПЛ турнир кестесінде үшінші орында тұр.
«Манчестер Юнайтед» 26 ұпаймен Премьер-лигада жетінші сатыда орналасқан.
АПЛ, 17-тур
«Астон Вилла» - «Манчестер Юнайтед» 2:1
Голдар: Роджерс, 45, 58 - Кунья, 45+3
