Эксперт «Кайраттың» «Андерлехтке» қарсы ойынындағы сәтсіздіктің себебін атады
Қазақстандық танымал бапкер Асқар Қожабергенов Sports24.kz порталына эксклюзивті пікірінде алматылық «Қайраттың» УЕФА Еуропа лигасының плей-офф кезеңіндегі алғашқы ойында бельгиялық «Андерлехттен» өз алаңында ірі есеппен жеңілуінің себебін түсіндірді.
Қазіргі «Қайраттың» әлсіздігі туралы
«Ең алдымен, бұл команда былтырғы «Қайратпен» салыстырғанда әлсіздеу деп есептеймін. Өйткені, ол кезде құрамда Сорокин, Громыко, Мартынович пен Жоржиньо бар еді. Ең бастысы, былтыр Сатпаев жасы келгеніне қарамастан, жақсы ойнап, нәтижеге ықпал ете алатын. Ал қазіргі «Қайраттың» жағдайында қарсылас ретінде өте тәжірибелі, Еуропадағы тәжірибесі мол «Андерлехт» түсті. Олардың деңгейі қазіргі «Қайраттан» әлдеқайда жоғары. Орталық қорғаушылар жетіспейді. Сол себепті Тапалов орталық қорғаушы позициясында ойнауға мәжбүр, өйткені, менің ойымша, қосалқы құрамда нақты осы позицияға лайық қорғаушы жоқ», – деді Қожабергенов.
Құрамды күшейту жайлы
Трансферлік терезе кезінде «Қайратқа» құрамды күшейту керек пе деген сұраққа сарапшы: «Алматылық команданың қандай мүмкіндігі мен жоспары болғанын білмеймін», – деп жауап берді.
«Әрине, Чемпиондар лигасына қатысу үшін құрамды сапалырақ толықтырғанын қалар едім. Мүмкін, сонда «Левскиге» қарсы ойында да мүмкіндік болар ма еді. Шынын айтқанда, «Левски» барлық жағынан басым болды деуге келмейді. Егер «Қайраттың» сапасы жоғары, мықты құрамы болса, «Левскиден» өту қолынан келер еді деп ойлаймын. Сол кезде (гректің) АЕК клубынан да өтуге күшіміз жетер еді. Бірақ, бұл үшін, әрине, құрамымыз күштірек болуы керек еді», – деп түйіндеді Қожабергенов.
«Қайраттың» бірінші ойындағы нәтижесі
Еске сала кетейік, УЕФА Еуропа лигасының плей-офф кезеңіндегі алғашқы ойында «Қайрат» Алматыда өз алаңында «Андерлехттен» 0:3 есебімен ойсырай ұтылды. Қонақтар алғашқы таймда-ақ үш доп айырмасымен сенімді басымдыққа ие болды. 4-минутта «Қайрат» қақпашысы мен қорғаушыларының қателігінен кейін Юко Оксанен өз қақпасына гол соғып алды. 23-минутта «Андерлехт» ойыншысы Лукас Амброс алыстан дәл және тоқтаусыз соққымен есепті екі еселеді. Тайм соңында Александр Широбоков дөрекі ойыны үшін тікелей қызыл карточка алып, алматылықтар азшылықта тағы бір гол жіберіп алды – таймның соңғы минутында Сикан есепті ірі жеңіске жеткізді.
Жауапты кездесу 27 тамыз күні Брюссельде өтеді.
