Денис Мамонов «Атырау» клубының бас бапкері атанды: КПЛ-дің аутсайдер командасы үшін жаңа кезең
«Атырау» футбол клубы жаңа бас бапкердің тағайындалғанын ресми түрде жариялады. Бұл қызметке 43 жастағы қазақстандық маман Денис Мамонов келді.
Ол 2025 жылдың 22 сәуірінен бастап уақытша бас бапкер міндетін атқарып келген Қуаныш Қабдоловтың орнын басты.
Мамонов бұған дейін де «Атырау» сапында жұмыс істеген - 2021–2022 жылдары бас бапкердің көмекшісі қызметін атқарған. Сонымен қатар, 2024 жылдың қазан айынан бері Қазақстан ұлттық құрамасының жаттықтырушылар штабының мүшесі болып табылады.
Мамановтың бапкерлік мансабында «Ақсу», «Мақтаарал» және «Жетісу» клубтарындағы тәжірибесі бар. Бұл тәжірибесі қазір қиын жағдайда тұрған «мұнайшылар» үшін маңызды артықшылық болмақ.
Қазіргі таңда Қазақстан чемпионатында 12 турдан кейін «Атырау» турнир кестесінің соңғы - 14-орнында тұр және тек төрт ұпайға ие. Клуб жаңа бапкердің келуі жағдайды өзгертіп, командаға жаңа серпін береді деп үміттенеді.
