Дағдарыс па, әлде серпіліс пе? «Елімайдан» жеңілген соң Чурчич «Қызылжар» ойыншыларын ескертті
Петропавлдың «Қызылжарының» бас бапкері Милич Чурчич Қазақстан Премьер-лигасының 22-турындағы «Елімайға» қарсы өткен ойынды қорытындылады.
Кездесу «Қызылжардың» 0:2 есебімен жеңілуімен аяқталды.
«Бүгін мықты команда жеңді, қарсыласты құттықтаймын. Өкінішке қарай, біз алаңға бейімделе алмадық: соңғы рет табиғи газонда бір жарым ай бұрын ойнадық. Матч басында маңызды қорғаушымызды жоғалттық, артынша гол жібердік. Қарсылас қақпасы алдында өз мүмкіндіктеріміз болды, бірақ оларды пайдалана алмадық. Бұған сылтау жоқ», – деді маман.
Сонымен қатар, Чурчич команда ішінде бәсекелестікті бағаламайтын ойыншылар бар екенін атап өтті:
«Кейбір футболшылар өз орнын ешкім тартып алмайды деп ойлайды да, толық күшін салмайды. Ондай ойыншыларға айтарым – көзқарасты түбегейлі өзгерту керек».
Бапкер жанкүйерлерден бүгінгі нәтиже үшін кешірім сұрап, енді басты назар Қазақстан кубогінің жартылай финалына аударылғанын жеткізді:
«28 тамызда бізді финал жолдамасы үшін нағыз шайқас күтіп тұр. Біз бұған дейін ірі клубтарға қарсы лайықты ойнай алатынымызды дәлелдедік, енді тағы да мінез көрсететін уақыт келді. Жанкүйерлерімізге қуаныш сыйлау үшін өте мұқият әрі байыппен дайындаламыз».
Бұл жеңілістен кейін «Қызылжар» 21 ұпаймен турнирлік кестеде 10-орында қалды.
