Қазақстан 2030 жылғы әлем чемпионатына жолдама үшін күресу құқығынан да айырылуы мүмкін: мән-жайы
УЕФА аймағында 2030 жылғы әлем чемпионатына іріктеу кезеңі мүлде жаңа форматта өтеді. Қазақстан құрамасының соңғы нәтижелерін ескерсек, Джон ван’т Схип шәкірттері әлем чемпионатына тікелей жолдама үшін күресе алмай қалуы мүмкін, деп хабарлайды Sports24.kz.
Жаңа форматқа сәйкес, іріктеу турнирі екі лигаға бөлінеді: А және В. Испания, Португалия және Мароккода өтетін турнирге берілетін негізгі жолдамалар сарапқа салынатын А лигасында Ұлттар лигасының рейтингі бойынша үздік 36 команда ойнайды.
Ал қалған 18 еуропалық құрама өнер көрсететін В лигасы алдын ала болжам бойынша тек іріктеу плей-оффына жолдамалармен шектеледі. Бұл лигада тікелей жолдамалар ойнатылмайды.
Қазақстан құрамасына төнген қауіп те дәл осы жерде жатыр. Ұлттар лигасының соңғы маусымының қорытындысы бойынша Қазақстан рейтингте 36-орынға жайғасты — егер жаңа формат дәл қазір бекітілген болса, бұл А лигасына өтетін соңғы орын болар еді.
Осы орынды сақтап, тиісінше әлем чемпионатына тікелей жолдама үшін күресті жалғастыру үшін Қазақстан 2028-2029 жылдардағы маусымда міндетті түрде А лигасына шығуы керек. Ұлттар лигасындағы А және В лигаларында енді 16 емес, 18 командадан ойнайтындықтан, дәл осы екі лига әлем чемпионатына іріктеудің ең беделді деңгейін құрайды.
- Сондай-ақ оқыңыз: Андрей Мартин Қазақстан құрамасының Ұлттар лигасында Молдовамен өтетін матчтағы мүмкіндігін бағалады
Қазақстанның Ұлттар лигасында жоғарылайтын жолы аса маңызды емес: бұл Словакия, Фарер аралдары және Молдовамен бір топтағы ойындардың қорытындысы бойынша ван’т Схип шәкірттеріне бұйыруы мүмкін плей-офф арқылы да жүзеге асуы ықтимал.
Плей-оффтағы жеңіліс немесе топта үшінші-төртінші орын алу Қазақстанды іріктеудің В лигасында қалдырып, тек плей-офф матчтарына деген үмітпен шектейді. Ал іріктеу кезеңінде топ-командалармен ойнау мүмкіндігі келесі рет тек 2030 жылы туады — сол кездегі Ұлттар лигасының нәтижелері Түркия мен Италияда өтетін 2032 жылғы Еуропа чемпионатына іріктеу жүйесін қалыптастырады.
