«Ақтөбе» Украина құрамасының қорғаушысымен қызығуда
Жақында «Ақтөбе» жанкүйерлері басқа клубтардың белсенді трансферлік жұмыстарымен салыстырғанда, өз сүйікті командаларының тым баяу қимылдауына алаңдаушылық білдірген еді. Алайда, «Ақтөбеде» де жаңа ойыншылармен келісімшарт жасау бағытында жұмыс жүріп жатыр.
asnews.kz хабарлағандай, клуб назарын украиналық қорғаушы Тарас Качараба аударып отыр. Ол қазір Словакияның ДАК 1908 клубының намысын қорғайды. 30 жастағы орталық қорғаушы Дунайска Стреда ұжымымен 2026 жылдың жазына дейін келісімшартқа отырғандықтан, оның трансфері қашан және қандай шарттармен жүзеге асатыны әзірге белгісіз.
Айта кетерлігі, Качараба алғаш рет Украина ұлттық құрамасының сапына 2021 жылдың қыркүйегінде, Қазақстанмен сырт алаңдағы матчта (2:2) шақырылған болатын. Қорғаушы Александр Петраков жаттықтырған команда үшін барлығы үш ойын өткізді.
Бұдан бұрын «Ақтөбенің» назарына «Оқжетпес» клубының вингері Дамир Марат та іліккені туралы хабарланған еді.
