Қапталдағы жаңа күш: «Елімай» Акмаль Бахтияровпен келісімшартқа отырды
Футболдан «Елімай» клубы жартылай қорғаушы Акмаль Бахтияровпен келісімшарт жасағанын ресми түрде хабарлады.
Семейлік клубтың баспасөз қызметі жаңа ойыншыны жылы қарсы алды:
«Қош келдің, Ақмәл! Алдағы сынақтарды бірге еңсереміз!»
27 жастағы Бахтияров өткен маусымда Ресейдің Екінші лигасында ойнайтын Астрахань қаласының «Волгарь» командасының намысын қорғады. Ол бұл команда сапында 38 матч өткізіп, 5 гол соғып, 6 нәтижелі пас берді.
Ресейге аттанар алдында футболшы Қазақстанның бірнеше клубтарында өнер көрсетті, олардың қатарында «Қайрат», «Ордабасы» және «Жетісу» бар.
Қазіргі уақытта «Елімай» КПЛ турнирлік кестесінде 14 турдан кейін 24 ұпай жинап, бесінші орында тұр. Клуб келесі ойынын 5 шілде күні өткізеді - семейліктер өз алаңында «Тобылды» қабылдайды.
Сондай-ақ Никита Корзун «Елімайдан» кетті.
