Анхель Ди Мария маусым соңында «Бенфика» сапынан кететінін растады
Аргентина құрамасының жартылай қорғаушысы Анхель Ди Мария маусым аяқталғаннан кейін Лиссабонның «Бенфика» клубынан кететінін ресми түрде хабарлады. Португалия чемпионатының соңғы турында «Брагаға» қарсы өткен ойында (1:1) ол клубпен келісімшартын ұзартпайтынын мәлімдеді.
«Бұл - менің «Бенфика» сапындағы чемпионаттағы соңғы матчым. Бұл жейдені қайта кигеніме мақтанамын», - деп жазды Ди Мария әлеуметтік желідегі парақшасында, жанкүйерлерге қолдауы үшін алғыс білдіріп.
Клуб басшылығы тәжірибелі футболшыға келісімді ұзартуды ұсынғанымен, Ди Мария Португалиядағы мансабына нүкте қоюды жөн көрді. Ол сондай-ақ 2025 жылғы Клубтық әлем чемпионатына да қатыспайды.
Ди Марияның бұл - «Бенфикадағы» екінші кезеңі еді. Ол алғаш рет клубқа 2007 жылы «Росарио Сентралдан» ауысып келіп, үш маусым бойы өнер көрсетті. Осы уақыт ішінде Португалия чемпионы атанып, Кубок иегері болды. 2023 жылы Лиссабонға қайта оралып, қоштасу маусымын өткізіп, барлық турнирлерде 39 матчта 15 гол соғып, 10 нәтижелі пас берді.
2024/25 жылғы маусым қорытындысы бойынша «Бенфика» Примейрадағы жарысты 80 ұпаймен аяқтап, екі ұпай айырмасымен «Спортингке» жол беріп, екінші орынға тұрақтады.