Андрей Демченко: Екі голдан кейін ойынды уысымыздан шығарып алдық – қарсылас осыны тиімді пайдаланды
Астаналық «Жеңіс» клубының бас бапкері Андрей Демченко Қостанайда өткен ойыннан кейін өз ойын ортаға салды. Кездесу 2:2 есебімен аяқталып, қос команда бір-бір ұпайдан еншіледі.
– «Ойынды өте сенімді бастадық: жылдам екі гол соғып, бастаманы толық өз қолымызға алдық. Бірақ кейін жекелеген қателіктердің салдарынан ойынға бақылауымыз төмендеп, «Тоболға» мүмкіндік беріп қойдық. Бірінші таймның соңында олар бір голмен жауап берді – бұл голды біз тойтара алатын едік. Әдетте, үзіліс алдында гол соққан командаға сенімділік беріледі, ал біз болсақ, сол сәттен кейін өз ырғағымыздан сәл айырылып қалдық», – деді Демченко клубтың баспасөз қызметіне берген сұхбатында.
Бұл тең ойын «Жеңіске» сырт алаңда маңызды бір ұпай әкеліп, команда 14 ұпаймен турнирлік кестеде сегізінші орынға көтерілді. Ал «Тобол» болса, 28 ұпай жинап, «Қайрат» пен «Ақтөбеден» кейін төртінші орынға түсіп қалды.
Келесі турда, 5 шілде күні «Тобол» өз алаңында «Елімайды» қабылдайды, ал «Жеңіс» маусымның жаңа командасы – «Ұлытаумен» кездеседі.
