Жәнібек Әлімханұлы Карлос Адаместі келемеждеді: \"Сен чемпиондық белбеуді тек уақытша ұстап тұрсың\"
IBF және WBO нұсқалары бойынша орта салмақтағы Біріккен әлем чемпионы Жәнібек Әлімханұлы (16-0, 11 КО) WBC белбеуінің иегері Карлос Адаместің (24-1-1, 18 КО) мәлімдемесіне жауап берді. Бұған дейін доминикандық боксшы өзін дивизиондағы ең мықты деп атап, сегіз аптадан кейін кез келген қарсыласқа дайын екенін мәлімдеген еді.
Алайда, Әлімханұлы оның бұл сөздеріне күмәнмен қарап, Адаместің онымен жекпе-жектен бірнеше мәрте қашқақтағанын еске салды. Сондай-ақ, оның соңғы жекпе-жегінде Хамза Ширазбен (21-0-1, 17 КО) тең түскенін, бұл оның шын мәнінде қандай деңгейде екенін айқындағанын атап өтті.
“Өзіңді қатыгез жекпе-жек шебері ретінде көрсетудің қажеті жоқ. Біз сені жақсы білеміз. Сен туралы артық сөз айтқым келмейді, өйткені сен маған ешқашан қарсы шықпайсың. Тіпті Ширазды да жеңе алмадың. Барлығы сенің менің деңгейімде емес екеніңді көрді. Сен чемпиондық белбеуді тек уақытша ұстап тұрсың”, – деп жазды Әлімханұлы X желісінде.
Қазіргі таңда қазақстандық боксшы алдағы жекпе-жегіне дайындық үстінде. 5 сәуірде ол Астанада рингке шығып, франциялық Анауэль Нгамиссенмен (14-0, 9 КО) жұдырықтасады. IBF рейтингінде жетінші орында тұрған бұл қарсылас Әлімханұлының мансабындағы маңызды сынақтардың бірі болмақ.